23Jul,JO, Turismo (1).jpg

 E  siman cu a caba di pasa tabata tin un caso di atraco riba turista cu a hala bastante atencion y a causa hopi preocupacion den pueblo.“Medewerker Bureau Communicatie Voorlichting en Preventie KPA”, Sr. John Larmonie a bisa Bon Dia cu turistanan ta aplaudi e presencia di polisnan den e area turistico, sinembargo e realidad di e asunto tambe ta cu e cantidad di polis cu tin obtenibel ta limita.

E cantidad di oranan cu por pone polis riba pia tambe ta limita, pues bo mester tin un elemento di vigilancia constante 24 ora pa dia na tur area y e unico manera cu por logra esaki ta pa inverti den un sistema di camara cu segun Sr. Larmonie, na tur parti di mundo ta haci esaki principalmente den areanan turistico.

”Mi a bin afo y papia varios biaha caba como persona di prevencion di crimen, y en berdad e ta un situacion hopi grave. Poco dia ey mi a menciona na un persona di prensa cu a puntra mi si tin estadistica y ta algo cu ta subiendo si of no,  mi a splica su persona bon cla cu estadistica no ta ni sikiera importante pasobra si nos a siña algo for di e caso di Natalee Holloway,  un solo caso riba su mes por haci daño na henter nos economia principalmente ora ta trata di turista” , Sr. Larmonie ta splica. Den e caso aki, segun Sr. Larmonie ta splica Bon Dia, e persona a relata kico a sosode cun’e riba Facebook den un post caminda cu el a detaya su experiencia horibel cu el a pasa den e atraco aki na Aruba.  Esaki ta causa un reaccion riba social media cu no ta mucho bon pa e popularidad di Aruba. ” Turismo ta hopi importante y nos ta depende totalmente riba dje, bao di circunstancianan asina, esaki no por tuma luga” , Sr. Larmonie ta bisa.
 
 

Pueblo mester cuminsa asumi responsabilidad

E area tabata completamente scur, no tabata tin personal di siguridad den e area tampoco. Polis ta patruya e area pero segun Sr. Larmonie, polis naturalmente no ta asina tampoco cu por ta na tur luga pareu. ”Ta cantidad di hotel tin riba e strip eynan y tur di nan mi ta sigur  mester tin personal di siguridad, cu nan tin suficiente ta un otro asunto. Nos tur tin cu bay traha hunto, e no ta cuestion di tira culpa riba e hotel of gobierno of ken su falta e ta.  Esaki ta un asunto cu tur hende mester aporta cun’e, nos como pueblo tambe mester cuminsa asumi nos responsabilidad” , Sr. Larmonie ta bisa. ”Nos tur mester tin e bos pa sali pa dilanti y defende nos turistanan, e area mester wordo miho ilumina, mester mas personal di siguridad y nan mester por vigila otro.  E hotelnan tambe por inverti mas den sistema di camara. Nos mester busca un manera pa maneha e echonan aki, no por ta asina cu por sigui atraca nos turismo pasobra esaki ta bay tin consecuencianan grave den futuro” , Sr. Larmonie ta bisa.

Camara di vigilancia den area publico ta necesario

Segun Sr. Larmonie, esaki ta un cos cu ta pega pa basta tempo y KPA,departamento di prevencion di crimen no tabata envolvi nunca den e proyecto of ningun otro proyectonan mas den e area. ”Nos semper kier a contribui anto nos por contribui cu tipnan y consehonan, pero nunca nos no a wordo envolvi den esey. Mi ta corda ultimo cos cu nos a tende si cu e ta programa pa cuminsa 1 di Juni despues a wordo hala pa 1 di Juli, mientrastanto esaki a bini y bay y nos no a tende nada mas di dje” 

Sr. Larmonie ta agrega cu e proyecto aki ta uno sumamente necesario y e mester wordo implementa mas rapido cu ta posibel. ”Tin biaha ora di menciona cierto cosnan asina bo ta haya hende ta rabia cu nos, pero e ta algo necesario. Nos turismo mester proteccion pasobra e merece esaki. Den pueblo, tur hende ta exigi pa nos turismo wordo protegi y cual sea e problema pakico esaki no a wordo implementa ainda, mester busca un solucion. Bo no por traha un plan integral di siguridad den area di nos turismo cu no ta inclui e proyecto di vigilancia di camara di e area.” Sr. Larmonie a bisa.

LEAVE A REPLY

Please enter your comment!
Please enter your name here