Ayera na Parlamento di Aruba a tuma luga un reunion publico den cual a aproba e presupuesto pa aña 2022 di e Tourism Product Enhancement Fund (TPEF), cu e presencia di minister di Turismo y Salud, Dangui Oduber.

TPEF ta un fondo estableci na aña 2010 pa eleva e producto turistico Aruba. Minister di Turismo y Salud Dangui Oduber a contesta diferente pregunta haci pa parlamentarionan. Den un di nan, a trece dilanti e situacion di ‘flooding’ cu tin na Baby Beach. Pa cu esaki, minister Oduber a expresa cu den e master plan cu tin nan Sero Colorado den cual proximamente nan ta bay anuncia e siguiente fase, DOW a presenta un solucion pa e situacion aki, caminda nan a haci un inversion caba pa pone santo blanco pa asina por amplia e beach di Baby Beach, teniendo na cuenta e diferente proyectonan cu ta den ehecucion.

E volumen di hende pa e area aki ta bay bira mas grandi y pa e motibo aki, segun minister Oduber a señala, den e master plan lo presenta e solucion pa e situacion di inundacion cu ta registra ora awa ta yobe.

E proyecto di parking lot tambe a cuminsa unda e destaho publico a wordo teni, segun el a informa, unda e proyecto ta den pleno ehecucion y loke ta falta ta e anuncio pa cu e siguiente fase unda nan tambe lo tene un openbare aanbesteding ainda den aña aki y pa comienso di aña 2023 e proyecto aki lo por cuminsa.

Di mesun manera, el a enfatisa na parlamentario di oposicion cu den e ronda di preguntanan a cuestiona e mehoracion di trapinan “cu uno, no ta presenta na trabao, dos, no ta educa su mes y tres no ta busca informacion mientras nos ta splicando esaki y e ta di biahe, p’esey nos ta lamenta cu awe impresion a wordo crea y sikiera elogia con Aruba ta manehando turismo y con Aruba ta e di dos pais na mundo cu a recupera su turismo di e forma aki”, el a bisa.

Un topico cu tambe a wordo treci dilanti, e importancia pa añadi enseñansa como pilar den Tourism Product Enhancement Fund (TPEF) den cual minister a expresa cu nan ta bay discuti di esaki conhuntamente cu e board di TPEF y ta algo cu nan por considera den e cuadro di inversionnan cu ta wordo haci, por ehemplo den scolnan manera EPB cu EPI “cu berdad falta di material y tur e intencion di studiantenan aki ta pa drenta den mercado laboral den industria turistico y pa por haci esaki, mester e material necesario”, minister Oduber a menciona.

Ademas, a wordo presenta un mocion tocante e proyecto di Hooiberg caminda ta pidi gobierno pa construi un man di sosten y tambe un pad pa personanan cu mobilidad limita pa asina por tin inclusion y tambe nan por tin acceso na e gazebo cu tin na comienso di Hooiberg.

“E ta un mocion cu nos tin cu wak si tin e fondonan disponibel, pasobra e proyecto di Hooiberg nos ta bezig ta ehecuta esaki den diferente fase y e ora nos tin cu wak kico ta e costo mara na esaki y wak si tin e fondonan den presupuesto 2024 pa nos por inclui esaki como un otro fase di e proyecto di Hooiberg”, el a señala.

Tocante situacion di Bubali Plas den cual a wordo puntra kico ta e cooperacion cu Ministerio di Turismo a duna na e solucion di e problematica cu tin, si tin comunicacion y participacion, el a bisa cu gobierno a tuma un decision cu e planta di RWZI di Bubali Plas ta bay wordo privatisa y cu nan ta den full swing pa ehecuta esaki conhuntamente cu Utilities Aruba N.V unda nan a wordo presenta un proyecto di Fundacion Parke Nacional Arikok na e board di TPEF e cual minister ta di opinion cu ta un proyecto bunita, ambicioso y costoso loke a wordo presenta cu no necesariamente ta dirigi riba un solucion di RWZI sino cu nan a presenta un proyecto di conservacion y proteccion di naturalesa, ademas di turistico caminda nan kier crea un tipo di ‘nature walk’ den Bubali Plas caminda lo tin un visitor information center na e area aki y un bird watch.

E proyecto aki lo tin un costo entre 8 cu 9 miyon florin, segun minister Oduber a informa unda TPEF so no por financia e proyecto aki su so, pero loke si nan a haci cu a wordo percura pa aloca 100.000 florin pa presupuesto di aña 2023 cu lo mester wordo presenta y trata den sala di parlamento ainda pa nan por haci e investigacion y evaluacion pa e fase di e proyecto aki.

Pa loke ta trata RWZI mes, minister Oduber a splica cu e tema aki ta wordo trata regularmente den conseho di minister y cu ta un topico di urgencia cu mester di un solucion “nos ta convenci cu a formula cu gobierno a presenta pa soluciona e problema di RWZI lo tin exito”.

Den otro orden di idea, tambe a wordo papia di e problematica di UTV y ATV minister Oduber ta comparti e pensamento cu nan no ta mashinnan sigur tanto pa turistanan como pa localnan cu ta huur esakinan unda a wordo registra un cantidad grandi di accidentenan caba y loke Ministerio di Turismo a haci ta presenta un otro proyecto di Mountain Bike pa asina tin alternativa cu turistanan cu kier experiencia e costa nort di Aruba y ta un proyecto den cual nan a bin trahando varios aña riba dje conhuntamente cu ATA cu ta bay lansa esaki oficialmente.

Pa finalisa, ayera Parlamento di Aruba a aproba e presupuesto di TPEF aña 2022 na e suma di 3.3 miyon florin. Di e fondo aki 1.6 miyon florin lo bay na inversionnan haci pa mehora producto Aruba pa asina ofrece un miho experencia na e bishitantenan.