Manera a bira conoci diaranson ultimo, Oranje The World ta e campaña di conscientisacion contra violencia contra mucha muhe y hende muhe unda cu den dieseis dia diferente organisacionnan ta participando pa asina conscientisa comunidad tocante e problema social aki.
Feria di Salud
Venearuba Solidario cu e proyecto La Casa del Venezolano conhuntamente cu Famia Planea, OIM y profesionalnan di Xavier University tambe ta uni na e campaña aki for di awe 25 di november te cu 10 di december unda nan lo ta organisando un feria di salud pa tur e famianan di Aruba.
E feria aki lo tuma luga mañan 26 di november for di 2or te cu 6or di atardi unda personanan por acerca pa haci un chekeo general di salud como nivel di sucu, indice di masa corporal, colesterol, entre otro.
Jennifer Lopez trahado social di La Casa del Venezolano a expresa na redactor di Bon Dia Aruba cu profesionalnan di universidad lo ta esun encarga di haci tur e testnan ey unda si nan ta haya algo iregular, mesora nan ta pone e persona al tanto di kico ta sosodiendo cu su salud, pa asina ey por asisti na un dokter specialista of ki medicamento mester usa si esey lo ta e caso.
Famia Planea tambe ta bay ta presente den e feria di salud unda nan ta duna informacion tocante e servicio cu nan ta brinda na comunidad enfocando riba e parti preventivo como por ehemplo e pildonan anticonceptivo, implante, entre otro metodo di prevencion di embaraso.
Pa e motibo aki Lopez ta invita comunidad di Aruba pa acerca na Xavier University cu ta ubica na Santa Helenastraat number 23 e dia mañan unda esaki ta bay ta totalmente gratis y mester presenta un identificacion como paspoort.
