Cu meta pa stimula muchanan pa haci actividad fisico; Maria College a realisa su sportdag ayera

Maria College a haci su sportdag e aña aki na tres diferente luga cu e fin di stimula e muchanan di ciclo basico y avansa pa haci deporte, pa hunga cu hermandad y sigui e bon caminda.

Asina a expresa Romar Arendsz ken ta fungi como docente di deporte di Maria College na Bon Dia Aruba cu un cantidad di aproximadamente 280 mucha di 14 klas conforma pa ciclo basico I y II, ciclo avansa di Maria College a reuni ayera na stadion Guillermo Prospero Trinidad, Compleho Deportivo Frans Figaroa y Britania pa asina nan por hunga den hermandad, siña hunga operativo cu otro y asina mes pa nan por conoce nan mentor.

Arendsz a informa cu mentor ta e persona cu ta dirigi nan klas, e persona cu ta representa nan mayornan na scol, unda cu cada klas tin un juffrouw of un docente cu ta guia e muchanan na scol, caminda cu cualkier situacion cu por sucede nan ta dirigi nan mes cu nan mentor.

“Si un di nan ta pasando pa un momento fastioso na nan cas, muchanan por acudi na nan mentor pa asina yuda nan den nan studio y e dia di mañan nan lo bay bon”, el a sigura.

Nan ta kere cu un mucha tin hopi problemanan social, tin biaha cu muchanan na cas awendia y vooral den pandemia nan no ta haya oportunidad di forma parti di un club di landamento, atletismo of futbol, pa motibo cu eseynan ta costa extra placa y nan mayornan no tin e posibilidad door cu algun di nan a perde nan trabou, e salario ta yega net y nan no tin un presupuesto adicional.

Den esaki Arendsz a menciona cu scol ta yuda traha un sportdag unda cu muchanan por sinti nan mes liber, tur mucha ta gusta hunga y den edad di 12 pa 16 aña e mucha ta purba di descubri unda nan ta formando nan caracter den edad di teenager.

“E ta leuk pa aparte di e formacion academico nan tin e parti social tambe cu nan por siña con pa deal cu otro, den e manera di normanan, principionan y balornan, pa e dia di mañan nan por ta competitivo den nan trabou y nan por tin un bon manera”, el a expresa.

E dia di ayera manera Arendsz a declara a bay hopi bon cu e actividad unda cu por lo menos 20 docente di Maria College y tambe stagiaire di IPA y otronan di Hulanda tabata bezig yudando cu e transporte di material, coy di bebe y cada klas tabatin nan mentor unda cu nan tabata cana stage pa stage cu 12 tipo di wega como ehemplo di awa, brainstorming, weganan operativo pa e grupo yega na e meta, tambe tabatin otro weganan den areanan di educacion.

Sportdag di Maria College ta tuma luga un dia so pa aña, segun Arendsz a informa pa motibo cu nan tambe ta organisa otro actividadnan na scol durante henter aña como por ehemplo di carnaval, feria di ciencia, arte, poema, Arendsz a comenta cu e curriculum ta hinca den aña anual den diferente area y tambe den esaki cu ta deporte.

Ora un muchanan ta drenta den edad hoben adolescente ta posibel pa nan perde interes den actividadnan fisico, entre scol, tareanan di cas, amigonan y tambe algun di nan cu tin un trabou parcial, muchanan tin cu haci hopi entre interesnan y responsabilidadnan.

Ta p’esey cu actividad fisico lo por yuda nan pa regula nan y sinti nan mes yen di energia, mehora e concentracion y atencion y asina tambe pa tin un miho salud y aspecto fisico.

Un deporte regular ta yuda nan mantene un peso saludabel asina como tambe ta preveni malesanan di salud den futuro, e recomendacion ta pa nan haci por lo menos un ora pa dia di actividad fisico.

Mayornan por yuda nan pa scoge ki actividad of deporte nan ta prefera pa haci pa mantene activo na unda cu muchanan ta gusta tuma nan mesun decision, un bes cu nan ta cuminsa nan ta disfruta e sensacion di bienestar, ta reduci nan stress y ta aumenta e forsa y energia cu ehercicio fisico ta aporta.