Cuater compania internacional a confisca crudo di tanker Icaro

WILLEMSTAD – A pesar di un veredicto di corte civil cu por los e tanker Icaro pa lag’e nabega bay busca crudo pa Corsou, esey no a tuma luga. Aki ta unda cu e 4 compania internacional, Exotic Waves, Ammon Shipping, Clion Limited y ULM Blandford, a impone confiscacion riba e tanker.

E companianan internacional a argumenta cu PDVSA mester paga prome y despues nan ta laga e crudo den e tanker bay, esaki tin un balor na 3 miyon dollar. Segun e companianan aki cu a impone e confiscacion ta, cu PDVSA mes no tin niun interes den e caso. Awor RdK y Isla BV, cu ta un subsidiario di PDVSA kier interveni den e caso.

Segun Refineria di Corsou (RdK), den estrecho consulta cu Refineria Isla, nan a entama e huicio sumario contra di esunnan cu tin confiscacion riba e crudo almasena riba e barco Icaro. E meta ta pa logra cu ta almasena e crudo cu tin riba e barco den tankinan na tera y ta laga e barco Icaro sali busca crudo cu ta destina pa Corsou na Venezuela. Segun, RdK recientemente a acerca y a sinta cu Refineria Isla pa wak con por bin cu un solucion pa e echo cu tin confiscacion riba e crudo cu tin riba e barco Icaro cu ta mara for di december na Bullenbaai. Entretanto siman pasa, Corte na Punda a duna permit pa e los e tanker bou di cierto condicion. Esaki aparentemente no a tuma luga pasobra Icaro ainda ta mara na Bullenbaai.