Cuater misa Catolico a bira victima di kiebro y ladronicia

ladron.jpg
“Mi tin un mal noticia”, asina pader Toti Fuentebella di Misa Santa Filomena a bisa dilanti su parokianonan di Paradera, prome cu el a cuminsa su  predicashi den e Santo Sacrificio di Misa di ayera tardi.
E mal noticia aki tin di haber cu ladronnan no a respeta Misa, y nan a kibra y horta den cas di Dios. Pader Toti a bisa na Bon Dia Aruba cu nan a lanta tempran diasabra pa habri e portanan di misa pa celebra Santa Eucaristia, pero e portanan tabata hancho habri caba. 
Misanan horta 
Pero esaki no ta un caso isola ya cu dos dia pasa Misa Santa Ana di Noord a haya bishita no desea di ladronnan cu a bay cu cosnan di balor. Mientras cu un siman pasa Misa di Santa Cruz a wordo horta, tambe esun di Savaneta y te hasta e Misa Cristo Rey di pader Jairo na Brasil, tampoco a scapa. 
“Esaki no ta Paradera so sino cu casi tur parokia di nos pais. Kico ta pasando?”, Pader Toti a puntra su mes. E ta kere cu nos pueblo mester bay bek den cos basico y informacion spiritual di hende adulto y muchanan.
Pader Toti tabata masha indigna pasobra el a bisa cu nan ta traha duro pa drecha y renoba e misa aki. Awor nan ta wordo hinca atrobe den gasto extra di alrededor di 3 mil florin, vooral awor cu nan ta trahando duro pa bin cu actividad pa genera fondo y drecha e cas parokial. 
“Esaki ta duel mi, nos a traha duro y nos ta lucha duro pa mehora, renoba y drecha misa. Pa motibo di bishita di ladron el a hinca nos den gasto atrobe”, el a bisa. 
E ladronnan entre otro a kibra un pida di porta di sacristia. Nan a habri tur lashi posibel pa busca placa. Te hasta nan a purba cu un mashin pa habri tres di e seis e caha fuerte chikito cu tin den misa pa e donacionnan cu a wordo destrui pa busca placa. Nan a bay cu tres fan y un speaker monitor cu nan mester encarga for di Merca. Nan a kibra un bentana y nan a forsa otro bentana pa nan drenta, pero menos mal nan no a kibra e bunita bitral di misa.
Pader Toti a bisa cu Minister Arthur Dowers di Husticia a bay papia cu ne, caminda e mandatario a bis’e cu sigur esaki tabata obra di e drogadicto ambulante cu a drenta misa pa busca placa y asina satisface nan bicio di adiccion. 
E religioso a bisa na Bon Dia Aruba cu e tin 18 aña bibando na Aruba y trahando den diferente parokia, caminda akinan el a siña con pa respet misa como cas di Dios. Pero lamentablemente esaki a bay perdi y ladronnan no tin respet hasta pa misa.

You May Also Like

‘Sucu ta cuminda pa cancer’

“Ami Sin Cancer” ta e buki nobo di e autor Romulo Fingal. E buki ...

image.jpeg

San Nicolas por spera presion di awa abou pa 2 luna relaciona cu mantencion Tanki Seroe Preto

Relaciona cu trabou di mantencion, WEB Aruba ta informa cu ta necesario pa saca ...

Hende grandi den movecion

Ayera mainta a tuma luga e evento Bazaar organisa pa Club Kibrahacha 60+. Unda ...

Construccion dilanti di lama na Fishermans Hut

ORANJESTAD – Na area di beach Fishermans Hut un compania a lanta un construccion ...

Liderazgo nobo na KPMG Dutch Caribbean y na oficina di Aruba

Mientras cu na nivel di Caribe Hulandes a bin cambio den liderazgo den KPMG, ...

12-11-16accidenteponton6.jpg

Autobus a subi caminda dal contra di un auto na Ponton

Dialuna merdia riba e caminda di Ponton a sucede un accidente unda un autobus ...