Ministro ta ‘bezig’ cu asbest…

editorial 2_15_1.jpg
Sin preocupa cu e bisiñanan bibando na menos di 100 metro, e trabao pa dera asbest na Lago Heights ta sigui manera nada no a pasa. E motibo pakico nan por haci esey ta pasobra practicamente no tin ley cu ta obliga na tene cuenta cu esey. E asunto di asbest, y no esey so, ta marca un buraco grandi den nos legislacion. No tin legislacion special a base di Hinderverordening, por ehemplo. Tampoco Aruba a ratifica e tratado number 162 di International Labour Organisation (Asbestos Convention, 1986), cu Hulanda a ratifica na 1999. Riba e lista di tratado ratifica pa Aruba, e tratado aki no ta aparece; nos ta conclui cu Aruba a nenga di ratifica e tratado, tempo cu Reino Hulandes a adopta e tratado aki na 1999. Ta interesante pa haya sa a base di ki consideracion Aruba a nenga pa e tratado ta conta pa Aruba.
Ta importante ilustra cu Aruba no ta miembro di ILO riba su mes, sino cu e ta forma parti di Reino Hulandes cu ta miembro. Den e asunto di ratifica tratado Aruba por dicidi di no laga un cierto tratado cu Reino ratifica, conta pa Aruba tambe. Den e caso aki ta di importancia ilustra cu e tratado aki, banda di formula cierto obligacion pa proteccion di trahador den maneho di asbest, tambe ta dedica atencion na cierto manera, na proteccion di poblacion den vecindario di instalacion unda asunto di uza of deshaci di asbest ta tuma luga.
Den e caso di e deposito di asbest asina cerca di e viviendanan na Lago Heights, esey sigur por a haci un diferencia. Hasta den caso cu gobierno no a sigui e obligacionnan legal prescribi aki den, e bisiñanan lo tabatin un caminda di cana, igual cu e trahadonan cu ta traha den e ramo di deshaci di asbest, pa loke ta nan proteccion na pia di trabao. Ta desconoci tambe si e desaprobacion di e tratado a keda discuti cu sindicato y gremionan cu tabata forma parti di e consulta tripartite cu mester existi semper como miembro di ILO. E obligacion di e consulta tripartite aki ta un responsabilidad permanente cu Aruba tin y no ta algo cu incidentalmente por atende. Tur esaki ta lanta e pregunta tambe si tin un sindicato cu ta boga pa e interesnan di esnan cu ta traha den e tipo di trabao peligroso aki y ta vigila si e dunadonan di trabao den e sector aki ta mantene nan mes na normanan di siguridad, aunke no tin norma stipula den nos leynan. 
Loke ta keda sin embargo, ta e malcontento cu e forma con e asunto aki a keda atendi, unda cu tanto e compania nobo estatal, e departamento di Natuur & Milieu, DTI y e ministro encarga tanto cu Energia como Medio Ambiente, no ta sikiera duna cara pa duna un splicacion pakico a opta pa dera material cu cierto riesgo pa salubridad asina cerca di area pobla. Como agravante, e trabao ta tumando luga den un temporada cu biento ta cambia hopi y ta supla di Zuid Oost, den direccion di e casnan riba halto di Lago Heights. Tur esaki sin midi mita palabra cu e habitantenan di e bario ey. Esaki ta e mesun ministro cu a propone su mes como e berdadero campeon di San Nicolas cu a percura pa e refineria haya un bida nobo, aunke no como refineria? Bueno, esaki ta e mesun ministro, en todo caso, cu a percura pa e refineria por reactiva, sin un letter di legislacion ambiental; e mesun ministro cu no por a garantisa den parlamento cu e refineria no ta cuminsa opera sin cu tin gas natural disponibel; e mesun ministro cu a declara den parlamento cu e material di e lagun di desperdicio riba tereno di e refineria podise ta ser uza pa kima den fornonan di e refineria mes…  Pero, ban clarifica un cos: e desperdicionan ey no a termina den e lagun pasobra e anterior operadornan di e refineria tabata haya iresponsabel pa procesa e cosnan aki?
Y, pa clarifica nos posicion den e asunto aki bon: nos ta consciente di e peligronan cu asbest ta representa y cual no. E no ta un material toxico riba su mes, pero por tin efectonan devastador riba pulmon di hende ora e fibra ta bula libremente den aire. Ta p’esey ta necesario precaucion ora ta kita e material aki y ta deshaci di esey na un manera responsable. Talbes, y mirando e paña y otro artefacto cu e personal ta bisti y uza, por bien ta cu ta cumpli cu cierto normanan di siguridad. Pero no tin un alma por bin dilanti y duna un splicacion drechi den e asunto aki? Pakico mester a laga e habitantenan bay te polis sin sikiera por haci denuncia, mientras cu por a atende e asunto na un manera mas abierto y transparente? Ta asina leu e arogancia di poder a yega caba cu ta asina ta atende preocupacion di habitante? Asina ta organisa otro siman e show di ‘green’? Anto nos tin un aña electoral cayente nos dilanti.

You May Also Like

Sindicalismo riba bon caminda?

Dia 1 di mei ta mundialmente e momento den aña pa reflexiona riba e ...

Partimento di puesto a cuminsa caba?

O ta laga informador caba su trabao? Informador Swaen no a ni cuminsa drechi ...

editorial.jpg

E fenomeno di apartamento, Con pa maneha esaki?

Durante e ultimo lunanan di aña cu a termina, tabatin mencion di e fenomeno ...

Pone e studiante Arubano central?

Den tur campaña electoral nos ta tende di plan (no nobo) pa pone mas ...

editorial 2_44.jpg

Become Energized

Man bun bespoke freegan, kitsch retro ethical banh mi williamsburg drinking vinegar sustainable heirloom ...

Kico partidonan ta bay ofrece nos na 2017?

Den nos analisis di fin di aña nos no a bay ainda ariba e ...