Centro Nacional di Inteligencia (CNI) di Spaña a revela un red di spionahe Cubano, pa evita cu un matrimonio di agente Castrista logra haya nacionalidad di e pais Europeo, segun un publicacion di e diario Las Provincias.
CNI “ta hibando un guera contra spionahe Cubano na Spaña desde hopi aña,” e publicacion ta bisa. “E bataya di contrainteligencia pa neutralisa e agentenan secreto di e regimen Castrista, aunke e ta conoci den tur e circulonan di seguridad di estado, ta silencioso y silencia,” pa no stroba e relacionnan diplomatico entre ambos pais.
Spaña ta un pais importante pa Cuba dentro di Europa, simbolisa pa e reciente presencia di autoridadnan Spaño y Casa Real na e celebracion di 500 aña di existencia di Habana.
Pero na e ocasion aki CNI mester a revela publicamente e existencia den teritorio Spaño di un set up di spion cu sueldo di Habana. La Casa, manera e servicio secreto Spaño ta conoci, a haya su mes forsa pa haci esaki pasobra tabata e unico y ultimo opcion pa evita cu un pareha Cubano cu ta agente secreto di Cuba, haya nacionalidad Spaño.
Parti di e informenan confidencial di CNI ta recogi den varios sentencia di Audiencia Nacional (Tribunal Supremo di Spaña; red.) di october y november aña pasa. Den e resolucionnan ey ta confirma e decision di gobierno di nenga na 2018 un matrimonio Cubano nacionalidad, a pesar di tin residencia legal y continuo na Spaña desde 2012 y ta carece di antecedente penal.
Ora cu gobierno a nenga e pareha Cubano nacionalidad Spaño, nan a apela e caso na Audiencia Nacional, pa conoce e argumentonan usa pa gobierno. E nombernan di e personanan envolvi no a ser publica. No ta prome biaha cu CNI ta obliga pa revela su informenan cerca corte pa impedi cu spion Cubano ta bira Spaño.
