Cuba a alcansa caba tres miyon di turista stranhero den e aña aki te awor, loke ta significa un crecemento acumula di 12 % compara cu e mesun periodo di e aña anterior, asina medionan local a informa.
Ministerio di Turismo a señala cu e resultado aki a keda registra 39 dia prome cu den e periodo igual di 2015 y ta considera cu esaki tabata posibel danki na “ e labor di e trahadonan di e sector, como tambe di otro area di economia y pa e apoyo di e gobierno di e isla”, segun un nota oficial.
Nan ta resalta tambe cu e “obhetivo maximo” ta “incrementa e resultadonan pa logra un mayor aporte na desaroyo di nos pais y na bienestar di pueblo Cubano”.
Di acuerdo cu e calculonan di e autoridadnan Cubano di turismo, na 2016 lo bishita e pais Caribense 3,7 miyon turista stranhero, 175.200 mas cu loke a registra na 2015, tempo cu e isla a kibra e record cu mas di 3,5 miyon di biahero.
E industria di ‘leisure’ ta ser considera esun mas dinamico di economia Cubano, y di dos den aporte di divisa, cu un cuenta di mas di 1.940 miyon di dollar na 2015, pa un crecemento di 10,7%, segun informacion di ‘Oficina Nacional de Estadísticas e Información’ (ONEI) di e isla.
