Maria Agramonte ta e persona cu a graba un video cu ta mustra un caso di violencia tanto fisico como verbal cu a tuma luga recientemente. Dialuna ultimo, unabes cu el a subi su grabacion riba Facebook, e video aki a bira uno viral.
El a tuma contacto cu Bon Dia Aruba pa expresa su preocupacion pa comentarionan cu a wordo skirbi riba e grabacion aki divulga via Facebook. Sra. Agramonte a bisa cu ora cu el a dicidi di divulga e video aki ta pasobra, e ta contra tur sorto di violencia of maltrato sin excepcion. No ta importa kende ta esun cu ta comete acto di maltrato, ya sea hende muhe of hende homber.
A pesar di e presion cu e ta hayando, e no ta bay kita of delete e video, pasobra el a laga sa cu ta cuestion di su principio como ser humano, ya cu e ta contra di cualkier sorto di violencia.
“Mi preocupacion ta e maltrato, no ta importa kende ta haci’e, ya sea hende muhe of hende homber. Ora cu ta trata di un maltrato mester reconoce esey.” Sra. Agramonte ta laga sa cu e no a graba e video aki cu intencion di haci daño pa ningun hende. Pero e video a bira uno viral y a hala atencion di miles di hendenan.
E ta haya cu si e ser femenino cu ta aparece riba e video aki a falta respet cu su palabranan ta un echo. Pero e ta kere cu e meneer cu ta aparece riba e video aki mester a adopta un actitud mas respetuoso y no maltrat’e cu golpi. Sra. Agramonte a bisa cu tabatin parti di e incidente di violencia aki cu e no a grab’e pa temor. E ta lamenta masha hopi e echo aki; y e ta haya cu si su partner no a interveni den e incidente aki, e desenlace lo por ta uno tristo y lamentabel, te hasta di morto.
Comentarionan
Pero el a haya comentarionan haci via su Facebook cu ta molesti’e, ya cu nan ta comentarionan cu tin di haber cu racismo y discriminacion. Sra. Agramonte ta di origen Dominicano, y e ta bisa cu nan sa cu tin Dominicano cu no ta bon hende; pero e tipo di hende asina nos ta hay’e den cualkier pais di mundo. “Ya cu tin hende bon y hende malo. Nos tur por comete eror, pero no tur di nos ta hende malo.”
E ta bisa cu ya caba e tin varios aña bibando na Aruba. E ta duna danki na Dios y na Aruba, ya cu el a sa di comporta su mes, y semper el a mantene un bon conducta y e ta un persona cu ta gusta traha, ya cu e no a bin Aruba pa causa daño na ningun hende.
“Mi no ta permiti cu e tipo di comentario ofensivo aki por daña mi imagen”, el a laga sa. Sra. Maria Agramonte ta masha indigna ya cu den e comentario aki el a wordo acusa di complice di e tipo di echo aki. “Mi ta un persona serio y responsabel”, el a bisa. E a laga sa cu e dia cu e ta bandona nos isla e kier bay cu su frenta bon lanta.
P’esey el a dicidi di tuma contacto cu e matutino aki pa aclaria bon e situacion aki pa cierto hende no sigui haci algun comentario y acusacion sin base contra dje. Si e situacion aki ta sigui scala e tin pensa di bay polis pa haci un denuncia formal contra e personanan cu ta acus’e di ta complice. E ta haci e personanan aki responsabel di cualkier cos cu lo pasa cu ne na Aruba. “Mi no tin enemigo y mi ta cana na Aruba sin problema. Esun cu tin mester di mi, mi t’ey na cualkier momento.”
E ta determina cu a pesar di cualkier cos, e no ta elimina e video aki. “Mi ta bay lag’e eynan pa e hende por lo menos por conscientisa su mes. Mi ta contra di violencia fisico, no ta importa kende ta haci’e; y tampoco e situacion di e problema mes. Pero e mal trato ta inaceptabel ni di hende muhe pa hende homber; ni di hende homber pa hende muhe.”
