“Cuido di adiccion a sufri pa e causa politico”

marlon.jpg
Hendrik Tevreden, un enfermero y aworaki specialisando den Psikiatria (Sociaal-psychiatrisch verpleegkundige) cu mas o menos 14 aña di experiencia den ramo di droga y adiccion,  ta splica Bon Dia Aruba cu e personalmente ta haya falta di un miho structura en cuanto ta cuido di adiccion.
Un cos cu ta importante na Aruba como tambe mundialmente segun Sr. Tevreden, ta cu cuido y politica no ta un bon combinacion pasobra un ta stroba e otro den diferente forma.  E ta bisa: “Den e parti di e shelter na Oranjestad por ehempel, esaki ami ta kere ta locual a sosode na Aruba. E la bira algo politico anto ora bo wak bon, e cuido a sufri pa e causa politico.
Kemen e tabata un decision politico cu si el a funciona of no. Pa laga e shelter habri of no, pa saca esaki for di caya of no pero e cuido, e cliente, e adicto a sufri.” 
Shelter Oranjestad 
Segun Sr. Tevreden, un shelter manera esun cu tabata situa na Oranjestad ta mas necesario cu nunca aworaki pasobra si bo bay den Caya, tin mas adicto cu nunca cu ta keda concentra den e area aki. “Si bo ta pone un shelter den caya cu e meta principal pa saca nan for di e circuito di adiccion, e ora bo ta bon  bezig. Pero naturalmente, bo tin cu opera esaki bon. E shelter den mi opinion tabata tin su necesidad di existencia den caya pasobra eynan e adictonan ta, nan ta concentra eyden unda bo por topa y atende cu nan.” 
Bo meta lo mester ta e ora ey pa bo por motiva nan suficiente pa bo saca nan for di caya anto pone nan den un institucion pa nan por bay rehabilita sea na Aruba of den exterior, segun e enfermero. E link aki ‘a muri’ anto e no ta directo mas cu e adicto riba caya pa e drenta un institucion. Esun cu por tin e suerte cu tin un famia cu ta keda push’e of un amigo cu ta keda para su tas y bis’e pa e bay rehabilita y busca ayudo, porta un dia e ta bay. Pero esun cu no tin e atencion eynan, ora cu e lanta mainta, su bida ta bira e mesun rutina atrobe mester bolbe purba haya un manera pa bolbe uza. “Na Aruba nos mester grow up y pensa kico ta bin prome, e cuido of politica. Kico nos ta bay scoge na e momento eynan.”
Marlonchi
Un caso pa tuma como ehempel cu ta haci hopi falta den e area di cuido di adiccion na Auba, ta esun di e conoci Marlonchi. Bon Dia Aruba a publica algun luna pasa cu Marlonchi a bay Hulanda cu ayudo di un grupo independiente pa e sigui un programa di rehabilitacion. E grupo a haci tur locual nan tabata por pa acomoda Marlonchi durante su proceso pa bay Hulanda, haya un luga di keda y te hasta cu nan mesun placa paga pasashi pa Marlonchi regresa bek Aruba. Esaki despues cu cosnan no tabata bayendo mucho bon cu ne na Hulanda. Marlonchi no a termina su programa di rehabilitacion na Hulanda pasobra e no tabata bon prepara prome cu el a bay. 
 
Riba su mes e no kier a bay ningun centro aki na Aruba, despues di tanto intento di rehabilitacion, su deseo tabata pa e bay Hulanda. Marlonchi mester a regresa bek Aruba pa varios motibo: e no tabata comporta na e centro, e kier a bay un otro caminda y tabata dificil pa coopera cu ne segun e grupo cu a mand’e. Aworaki Marlonchi ta bek na Aruba anto Bon Dia Aruba a topa cu ne bek riba caya na San Nicolas. E mesun grupo incluyendo mas hende di Hulanda kier sigui yud’e y ta bay purba di haci mas intento cu ne.
 
Ta haci falta di mas profesional
E materia aki ta hopi amplio segun Sr. Tevreden pero e parti principal ta pa atende cu e persona.  E ta bisa: “E persona nos ta mir’e como algo holistico. Basicamente bo tin cu atende cu e totalidad di e hende: su mente, parti spiritual y emocionnan. Como enfermero, fuera di purba di atende cu e persona na tur e diferente areanan aki, mi ta atende tambe e parti di su curpa y e daño cu a wordo haci pa via di añanan di adiccion.”
 
E ta splica cu aworaki e ta bezig ta completando un estudio di adiccion na droga na Aruba pa enfatisa riba kico ta haci falta pa cuminsa alivia esaki. “Semper nos ta bay tin e necesidad di algo mas. Adiccion ta un malesa progresivo y hopi compleho. Ora bo ta kere bo ta atende cu tal parti di e adiccion, ya esaki a progresa anto bo mester atende cu otro parti.” 
 
Su experiencia ta cu na Aruba ta haci falta di mas profesional riba e ramo aki anto un miho acomodacion pa e tipo di hendenan aki cu tin mester di ayudo. “Con cu bo wak e, adiccion na droga of tur otro malesa ta rekeri un cierto entrada di financia tambe pa bo por atende cu ne. Mi ta kere cu nos ta haci nos best, nos maximo, pero naturalmente bo ta wak den region y luganan mas avansa manera Europa, bo ta mira cu nan tin hopi estudio cu nan ta haci riba nan mesun luga.”
 
Cultura ta hunga un rol grandi 
Adiccion na droga tin su cultura. E mesun forma of e mesun tipo di droga cu ta concentra riba Aruba kisas no ta concentra riba mesun nivel na Europa of cualkier otro parti di mundo. “Ta depende na e cultura  di e hende mes anto p’esey ta haci cu e ta bay cay den droga den forma cu ta mara na su cultura tambe.”
Sr. Tevreden akinan ta referiendo na e mentalidad cu nos tin por ehempel riba algo popular manera marihuana, den e cultura Caribense e ta wordo mira manera algo natural y di Dios. E cosnan aki por ta berdad pero ta dificil segun Sr. Tevreden pa bay atende  cu e persona anto bis’e cu “e cos aki ta algo dañino” of cu e no ta crea pa esey. “Bo tin cu identifica cu e cultura di e persona cu ta den e situacion y esey ta cambia den tur continente. Tur pais ta pensa diferente anto e ambiente cultural ta diferente.”
 
No tin cifra
“Nos no tin un indicacion specifico na cuanto hobennan, adulto, hende homber of muhe tin problema cu adiccion. Nos no tin cifra. Kemen nos no ta ataca e problema den un forma structura pa nos por domin’e mas miho.”
Pa motibo cu e problema di adiccion ta uno progresivo, ta yega un cierto momento cu e ta avansa y bay laga bo den e forma cu e por domina bo pais.  Segun Sr. Tevreden, esaki por desaroya te ora cu bo no lo sa mas unda pa cuminsa ora di bay purba di soluciona e problema.

You May Also Like

tumberito.jpg

Ganadonan di Tumberito Festival 2016

Resultado Tumberito Festival 2016: CATEGORIA INFANTIL: Ganadora: Sendy Loefstop – Cantica: Mi Ta Cla ...

AAA ta aclara proceso pa operador nobo

Actualmente Aruba Airport Authority N.V. (AAA) ta den proceso pa busca un operador pa ...

ymca

YMCA ta ofrece curso pa cushina pa Beursalen

E paso cu studiantenan ta tuma pa bay studia afo ta uno grandi. Cu ...

Andrew Hoo nombra como nobo alto comisario interino

Andrew S. Hoo ta nombra como alto comisario interino di cuerpo policial. E ta ...

musica.jpg

Segun presidente Musica: No ta Musica a para e festival

Den un reunion yama awe pa presidente di organisacion Musica el a trece cantidad ...