E ta un hecho cu casi un den tres lector lesando esaki awo, den nan bida lo sufri y te hasta fayece door di e malesa aki. Na mesun momento un palabra cu ta causa hopi division aki na Aruba ta esun di vacuna. Den e añanan cu a pasa, y vooral e delaster lunanan, nos por a nota data cientifico di diferente estudio clinico unda a usa vacunanan contra cancer. Den e columna aki nos lo toca e tema di vacuna contra cancer, cu un pregunta clave: E cura pa cancer ta den horizonte?
Kico ta un vacuna contra cancer?
Hopi di nos lo ta conoci cu e vacunanan tradicional contra Polio, Sarampi, y mas recien contra COVID. Un vacuna contra cancer mayoria biaha ta usa e metodo di mRNA. E tecnologia di mas avansa den e cuadro aki ta vacunanan di mRNA completamente personalisa. Con esaki ta traha?
Ora un pacient kita su tumor via operacion, dokternan ta analisa e material genetico di e tumor pa identifica e mutacionnan unico cu ta biba solamente den e celnan di cancer di e pacient unico aki, nan yama esakinan “neoantigenonan”. E data aki ta bay den un sistema di computer avansa, unda ta wak e neoantigenonan mas relevante pa e pacient unico aki. Despues ta traha un vacuna mRNA, completamente unico pa e pacient en cuestion.
Den e fase final ta duna e pacient e vacuna mRNA aki, hopi biaha cu otro medicina inmunologico pa asina e sistema inmunologico di pacient por reconoce e celulanan canceroso como algo cu mester elimina. E resultadonan di e proceso aki te ainda ta parce masha asombrante mes.
Kico estudionan clinico ta mustrando?
Melanoma (V940 / mRNA-4157 cu Keytruda)
E studio mas avansa ta e KEYNOTE-942 (Fase 2b), esaki ta un “randomized controlled trial (RCT)” berdadero cu 157 pacient cu melanoma di riesgo halto, despues di operacion. Un grupo a ricibi V940 (un tipo di vacuna di mRNA) combina cu e medicina inmunologico Keytruda, e otro grupo Keytruda so. Na januari 2026, e resultadonan di siguimento di 5 aña a mustra cu e combinacion di V940 + Keytruda a reduci e riesgo di recurencia of morto cu 49% compara cu Keytruda so.
Cancer di Pancreas (autogene cevumeran, MSK / BioNTech / Genentech)
Cancer di Pancreas ta un di e formanan mas letal di e malesa aki, conoci pa ciencia medico. Te ainda no tin mucho speransa pa pacientnan cu ta sufri di tipo di cancer aki. Normalmente ta apenas 13% di pacient cu cancer di pancreas lo ta bibo despues di 5 aña.
Un estudio chikito pero remarcabel na Memorial Sloan Kettering Cancer Center (New York) a duna 16 pacient un vacuna mRNA personalisa (autogene cevumeran) despues di operacion. Resultado di siguimento di 6 aña, presenta na e conferencia AACR 2026, tabata sorprendente: Di e 8 pacient cu nan sistema inmunologico a reacciona riba e vacuna, 87.5% ainda tabata na bida despues di 6 aña, compara cu apenas 25% entre e pacientnan cu no a reacciona riba e tratamento. Basa riba e resultadonan aki, un estudio mas grandi y aleatorio (Fase 2, NCT05968326) ta na caminda actualmente den varios sitio mundialmente.
Actualmente tin mas cu 120 studio clinico activo mundialmente cu vacunanan mRNA contra cancer, incluyendo cancer di pulmon, seno, prostaat, melanoma, pancreas y tumor di cerebro.
Cura pa cancer den horizonte?
Nos mester nota un par di limitacion importante tambe: e vacunanan personalisa ta caro y complica pa produci, ya cu cada un mester wordo traha specificamente pa nan mesun RNA di e tumor di cada pacient individual; e periodo di produccion (algun siman) no ta sirbi pa tur tipo di cancer ainda.
Aunke masha impresionante te ainda, mester nota cu nos mester warda te 2029, pa e casi 120 estudio clinico wordo finalisa y publica pa comunidad cientifico por verifica tur esaki. Nos tin cu bisa si, cu te awo, tur e data cu ta wordo publica ta duna mi persona un speransa masivo cu dentro di poco por tin metodonan di elimina cancer hopi mas eficiente di locual nos custuma cune awo.
