Curaçao cu ‘aanwijzing’… Aruba ta riba tera firme?

Nos hermana isla Curçao a caba di haya e mal noticia, cu CFT a pone Conseho di Ministro di Reino na altura di nan recomendacion pa duna gobierno di e isla un ‘aanwijzijng’ (instruccion) pa tuma medida pa mehora estado di finanzas publico.

Segun CFT, pa di tres aña sigui gobierno di e isla no ta logra mantene un presupuesto balansa, y ta señala tambe cu tin deficiencia den maneho financiero, manera calculacion demasiado optimista di entrada, deficiencia den administracion financiero y un falta di disciplina presupuestario cu ta haci cu e gastonan no ta keda dentro di e limitenan estableci den presupuesto. Ta zona conoci? Pa 2019 CFT ta mira un deficit di NAf. 100 miyon y no ta haya cu gobierno di e isla ta atende e problema aki cu diligencia.

Si nos kier tin un bista cla di e problemanan di e isla, nos no por contempla solamente e problemanan di gobernacion. Pa varios aña nan economia ta luchando pa yega na sikiera un crecemento chikito, loke no ta logra y cu consecuencia cu di e banda ey no por spera mas entrada pa caha di gobierno tampoco. E contratiempo ta bin di diferente banda. Pa cuminsa e sector financiero, cu tabata un di pilarnan fuerte, ta birando menos lucrativo, a base di e presion mundial riba e teritorionan cu tabata gana bon placa cu administra negoshi offshore. Mas y mas e paisnan desaroya ta tuma medida pa evita cu companianan di nan propio pais ta hiba ganashi pa otro teritorio pa evadi pago di impuesto. E medidanan tin consecuencia bastante serio pa islanan manera British Virgin Islands, Bermuda, Cayman Islands, Bahamas, y tambe Curaçao.

Na Aruba, aunke cu semper tabatin un sector financiero hopi mas chikito cu Curaçao, tambe nos a sinti e medidanan di e paisnan grandi, loke a conduci na varios cambio di ley cu Aruba mester a implementa. E mas reciente caso ta e sucesonan di ultimo simannan, unda Aruba a termina riba lista preto di Union Europeo como pais cu no ta duna nan cooperacion den establece e legislacion rekeri, pa por ser considera pais cumplidor cu reglanan internacional pa trafico financiero transparente. A resulta cu den nos caso, e problema tabata evitable si autoridadnan concerni tabata djis un tiki mas diligente. Awor, inmediatamente despues di e decision di pone nos riba e lista indesea, nos por hala rosea atrobe pasobra a pasa e ley den parlamento siman pasa.

Pero Curaçao a topa cu mas problema economico, cu ta mustra cierto similaridad cu Aruba. Ultimo añanan gradualmente industria petrolero na e isla a cuminsa haya mas y mas problema, algo inevitable pasobra e partner cu ta opera e refineria ta e empresa estatal Venezolano Pdvsa, cu consecuencia cu e problemanan na Venezuela a cuminsa ‘boil over ‘ na e isla. E problemanan financiero di Pdvsa a trece duda si esaki tabata e partner pa continua e convenio di operacion cune, cu ta termina e aña aki. Na maart 2018 e empresa Venezolano a mustra su interes pa continua cu operacion, y hasta a haci un pedido cerca un compania Frances, Axens Performance Programs, pa elabora un plan pa un tubo di gas natural di Puerto Cumarebo te Curaçao, pa e refineria por opera usando gas, y no fuel oil como combustible pa su procesonan. Cu esaki nan lo a logra dos obhetivo: opera mas barata, mirando prijs di gas natural compara cu fuel oil, y trata di silencia e critica constante di e enorme contaminacion cu e refineria den su actual forma ta ocasiona.

Tur esey, sin embargo, por resulta en vano pasobra e situacion di e compania ta tal cu e ta cerca di un collapse total, mescos cu su propietario, estado Venezolano.

Aki tin otro paralelo cu Aruba, unda siman pasa practicamente e historia di refineria na nos isla a yega na un fin. Banda di similaridad naturalmente tin diferencia tambe. Curaçao por bisa cu nan tin un refineria, cu ta produci gasolin, diesel y jetfuel, e productonan clave pa e pais mes. Na Aruba ta lidia ainda cu un instalacion obsoleto, cu tin como 35 aña sin por produci gasolin, y ultimamente hasta a recuri na e unico funcion cu e por tin ainda, un ‘upgrader’ pa produci crudo mehora. Interesante ta cu tempo cu Pdvsa a haci pedido pa un pipeline di gas pa Curaçao, nan no a ni pensa riba uno pa Aruba, mientras e distancia ta hopi mas cortico y parti di e convenio cu Aruba, pa por realisa e famoso refineria ‘berde’ di gobierno anterior… Esaki na varios ocasion nos a trece dilanti como un di e señalnan cu Pdvsa no tabata serio den henter e asunto di un rehabilitacion di e refineria na San Nicolas. Y awor cu e decision a pasa pa man di e adversarionan politico, Juan Guaido y su gobierno no instala ainda, nos no ta haya tende nada positivo tampoco.

Pa bolbe na Curaçao, e isla no tin un motor manera e sector turistico ta pa Aruba. Manera practicamente tur isla den Caribe, e alternativanan pa boost economia ta keda limita, y corta gasto tambe tin su limite. Curaçao ta bisando Hulanda “nos kier, pero nos no por”. Aruba no tin pakico yega na e punto ey.

 

You May Also Like

editorial 2_15_1.jpg

Falta di control algo structural den gobernacion..Tempo pa menos oficina y mas inspeccion?

Mientras nos ta observa cu gobierno ta paga demasiado salario (casi 7000), ainda nos ...

Caya Grandi no ta depende di klem so

Por lo pronto, prome ministro Eman a posiciona su mes na prome luga pa ...

editorial 2_15_1.jpg

Hues ta bati riba man di ministro atrobe Pero no tin cambio di actitud…

Pa di tantisimo biaha den e ultimo lunanan un hues ta condena gobierno, y ...

editorial 2_15_1.jpg

Guera cu gobernador a caba o ta cuminsa?

  Mientras a bira inevitabel pa gobierno y su subalternonan den parlamento cumpli cu ...

Formacion di gobierno ta birando comico

Sinterklaas ta cay tempran e aña aki… Realmente formacion di gobierno involuntariamente ta birando ...

Parke Nacional Arikok: Manera cos NO mester a bay…

‘Never a dull day in Aruba’ nos por bisa, contemplando e problema cu a ...