(Telemundo) – Autoridadnan di Panama a aresta e guy di Valentina Trespalacios, un DJ di 23 aña cu a ser haya morto den un tas na un bari di sushi di Bogota, Colombia.
E sospechoso principal di e asesinato brutal aki a ser identifica como John Poulos di 35 aña di edad y ta un ciudadano Americano.
E DJ a conoce Poulos 9 luna pasa riba Internet, di acuerdo cu loke su famia a indica. Ultimo biaha cu a wak Trespalacios cu bida tabata diasabra ultimo, ora el a manda un video na su mama den cual e tabata hunto cu su guy. E curpa di Trespalacios a ser haya un dia despues na localidad di Fontibon, e parti west di e capital Colombiano. Poulos a disparce despues cu e tragedia a bira conoci, pero autoridadnan a detene diamars ultimo na Panama. Segun rapportnan, e tabata den transito na e pais aki pa asina continua su biahe pa Estambul, Turkia.
Segun e mama di Trespalacios Laura Hidalgo a conta, diadomingo ultimo el a lanta cu e yamada di un amigo di su yiu indicando cu e curpa di dje a ser haya den un bari di sushi, su curpa a ser bandona den un tas cu señalnan di horcamento.
Tambe nan tin e sospecha cu Poulos ta e sospechoso principal pa motibo di e actitud di dje pa e hoben musico, e famia tabata describi su guy como ‘obsesivo, celoso y controlador’ na unda cu na december ultimo a contrata un investigado priva pa sigui e movementonan di e DJ.
Di confirma cu e asesinato a ser cometi pa Poulos manera e famia ta sospecha, e caso di Valentina Trespalacios lo ta un di e prome caso di feminicidio na e pais, den cual ta calcula cu por tin entre cinco y nuebe den luna di januari so. Aña pasa, Fiscalia di Colombia a investiga 180 caso di asesinato contra hende muhe como feminicidio, aunke organisacionnan como Observatorio Colombiano di Feminicidio, un iniciativa di Sociedad Civil, ta indica cu tabatin 612 caso den henter aña 2022.
