Un aña despues di un serie di concierto na Puerto Rico cu a resulta di ta su ultimo pa motibo di e pandemia, Daddy Yankee ta trece e presentacionnan aki riba YouTube como un regalo di Pasco pa su fanaticonan rond mundo.

‘DY2K20’, e version digital di su show ‘Con Calma Pal’ Choli’, lo ser lansa den tres parti riba canal di YouTube di Yankee, cu e prome parti revela ayera. E otronan lo ta disponibel dianan 14 y 21 di december respectivamente.

“Mi tabata kier duna un regalo di Pasco na tur mi fanatico durante e pandemia, trece e fiesta na nan cas sin cobra, trece nan alegria den e momentonan asina dificil”, e strea di reggaeton a bisa AP den un entrevista telefonico for di Miami.

Yankee, kende a permanece mas tanto fuera di spotlight na 2020, a bisa cu mientras cu e pandemia a afecta hopi masha duro, tambe a permitie pa haci algo cu e no a haci den tres decada: Enfoca riba su salud y descansa.

Ta algo cu e mester a siña gradualmente despues di aumenta 40 libra di peso durante e prome luna di cuarentena. “Talbes pa motibo di e ansiedad… mi a cuminsa come y come y come y aumenta peso manera nunca antes. Mi a yega na pesa 230 libra… Pero mi a recupera mi peso normal di 10 aña pasa. Esey tabata mi enfoke”, e cantante di ‘Despacito’ y ‘Gasolina’ a bisa, agregando cu el a logra su meta door di vigila kico e ta come y ehercita, hopi.

“Mi a dedica mi mes na mi salud, y na algo cu tabata desconoci pa mi, cual tabata descanso”, el a bisa. “Mi a cuminsa siña con pa biba cu calma y aprecia esaki… Y mi ta sinti mi diferente, mi ta sinti den un fase nobo completamente.”

Awo cu el a recupera balans den su bida, e ta sinti cla pa reactiva su carera. Ademas di ‘DY2K20’, e tin otro sorpresa pa su fanaticonan: Un colaboracion musical nobo cu e lo lansa den proximo dianan, maske e no a duna ningun detaye ainda.

Pa awo, el a bisa cu e ta bendiciona di finalmente comparti cu mundo e imagen di un show na e Coliseo de Puerto Rico Jose Miguel Agrelot, cu a involucra mas di 80 persona cu a traha cu ‘gran pasion, gran creatividad’. E tabatin bon recepcion, bayendo di dos fecha programa na un residencia completo, cu 12 show sold-out, of benta di 170mil ticket.

Loke hopi talbes no sa ta cu un problema tecnico riba e anochi di apertura a resulta den un oportunidad comercial nobo: conciertonan masivo den oranan di dia, algo nunca antes bisto riba e isla.

Despues di keda atrapa riba un plataforma riba escenario, Yankee a anuncia na e audiencia cu e lo duna nan un show extra gratis, y tabata un matinee. El a ahusta e contenido pa hacie apto pa un audiencia familiar, y a termina haciendo otro show asina.

Otro aspecto unico di ‘Con Calma Pal’ Choli’, cu a conta cu artistanan manera Ozuna, Wisin & Yandel y Nicky Jam, tabata e uso di holograma pa reemplasa esnan cu no tabat’ey pa haci un presentacion en bibo.
“Mi tabata kier pa e artistanan ta gigante, den cara di hende, pa e audiencia sinti cu nan tabata dilanti di nan y nos a logra esey”, Yankee a bisa. “Tabata un concierto cu a converti den un residencia, como si Las Vegas a move na Puerto Rico.”