E weganan di play-off 2016/2017 di Arubaanse Voetbal Bond a continua diaranson y diahuebs fuertemente na stadion Guillermo Prospero Trinidad na Dakota. E aña aki a dedica e campeonato na Theo Ruiz, Cadochi Kock, Betto Peña y Frans Dijkhoff. Diaranson anochi pa Britania a topa cu Deportivo Nacional den un wega cu ambos team a subi tereno dicidido pa gana.
Desde inicio di wega ambos team a hunga na un nivel halto y a percura cu tur fanatico por a disfruta di un bon wega. Den e prome 15 minuut di wega e prome carchi geel di wega ta cay pa Jonathan Ruiz y na di 39 minuut Miguel Guitierrez di Britannia. A anula e prome gol di Nacional ora cu linesman a hisa e bandera indicando offside. Ambos team a keda ataca area di gol y faltando algun minuut pe prome tempo termina, Sebastian Montoya di Britannia a anota e prome gol di wega. Den e di dos tempo Darwin Oliviera di Deportivo Nacional a empata e wega.
Deportivo Nacional a bay ariba cu gol di Roy “Killer” Albert pa haci e wega 2-1, pero Britannia no a rindi y ta empata e wega cu gol di Luis Estrada. Ambos team a sigui bataya fuerte y na 70 minuut Chito v/d Biezen a haya e prome carchi geel pa Deportivo Nacional, mientras cu na 81 Luis Estrada a ricibi e ultimo carchi geel di anochi. Na di 90+1 minuut di wega Nacional a bay ariba cu gol di Darwin Oliviera haciendo esaki 3-2. Tur hende a kere cu Nacional lo a bay cu e victoria pero na di 90+4 minuut di wega John Lugay a anota e gol di empate y asina e wega a termina 3-3. Diahuebs anochi stadion na Dakota fanaticonan di RCA y Dakota a yega pa apoya nan teamnan. Desde inicio di wega Dakota y RCA a bataya fuerte buscando e victoria. Na di 2 minuut di wega Dakota a bay ariba cu gol di Emile Linkers, unda cu e wega ta continua y na di 38 minuut RCA a empata e wega cu gol di Cristian Sinisterra. Den e di dos tempo ambos team a subi tereno dicidido pa bay cu e victoria, unda cu na 53 minuut di wega Paul Nickelson a haya un carchi geel mientras cu na 62 minuut Jonathan Odor a haya carchi geel.
Dakota a haya e oportunidad di anota e di 2 gol na 68 minuut cu gol di Ricky Hodge. Tension a subi unda cu e ambos team tabata busca mas gol y na di 76 minuut di wega Jean Ullyse di RCA a haya carchi cora despues cu el a stoot referee kende a cay. Esaki a pone mas presion riba RCA kende mester a hunga cu 10 hungado. Na final Dakota a bay cu e victoria di 2-1 contra RCA. E tabla di posicion te cu awo ta Dakota na prome luga cu 4 punto cu un wega gana y un wega tabla, RCA na di dos luga cu 3 punto cu un wega gana y un perdi, Britannia na di tres luga cu 2 punto cu 2 wega tabla y Deportivo Nacional na di cuater luga cu 1 punto cu 1 wega perdi y 1 tabla. Awe dia 23 di Mei pa 8:00 PM Britannia lo enfrenta RCA y diaranson dia 24 di Mei Dakota lo enfrenta Deportivo Nacional pa 8:00 PM.
Tur wega ta tuma luga na stadion Guillermo Prospero Trinidad na Dakota. A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.
