Tin un cantidad di discusion riba eleccion, pero ningun momento Parlamento mes a reuni pa determina kico por a pasa cu e fondonan di fraccion di POR, cu awor ta parti di un investigacion penal.

“E tabata motibo pa cual Prome Minister Evelyn Wever Croes a desmantela Parlamento. Pero e tipo di supuesto malversacion di parti di fraccion di POR, esaki te cu awor no a keda trata den Parlamento. No a yama ningun reunion riba e tema aki pa Presidente di Parlamento, ni tampoco Prome Minister Demisionario a bin te cu awor pa splica na Parlamento kico realmente tabata motibo di su decision.”

Consecuentemente e leynan di Cannabis medicinal y Presupuesto 2021 a keda pendiente. Pa ambos ley, Parlamento ta den espera di contestanan por escrito di Gobierno Demisionario, pa asina Presidente Thijsen por yama e reunionnan aki.

Cambio den conteo di votacion

Parlamento a ricibi un rapport traha pa Departamento di Registro Civil y Censo dia 16 di Augustus 2019. E rapport aki a ilustra tur loke por a mehora den eleccion 2017, y entre otro a menciona cu un sistema pa eleccion digital lo por facilita esaki.

Despues di e rapport aki, Parlamento no a debati mas tocante e topico aki, ya cu si kier a haci e cambio aki, e lo mester ta a base di un Lbham, manera prescribi den artikel 1. Registro Civil y Censo tambe ta esun cu recientemente, dia 8 di April ultimo, a duna un presentacion na Parlamento riba e proposicion pa un cambio temporal di e ley di eleccion (Kiesverordening) y no e Conseho Electoral. E mester ta cla si cu e Departamento di Registro Civil y Censo solamente ta duna sosten na nivel administrativo/publico y formalmente no ta parti di e Conseho Electoral. Como tal, e comentarionan riba posibel cambionan den Amigoe Di Aruba sin un confirmacion di miembronan di e Conseho Electoral ta yamativo (red. awe Presidente di Conseho Electoral Glenn Thode tin un conferencia di prensa for di Hulanda pa atende cu e punto aki).

Mas ainda, articulonan 52 y 53 di nos Ley di Eleccion ta papia di e posibilidad pa haci uzo di mashin di vota en bes di stembiljetten, y no pa separadamente haci uzo di un sistema digital pa conta e biyetenan di votacion fisico. Esaki ta crea e impresion cu un stembiljet mester drenta habri den e buzon, cu ta nifica cu e ta bay directamente contra articulo 61, inciso 2 di nos Ley di Eleccion.

E Parlamentario ta bisa cu tin hopi pregunta, poco confianza y hasta menos tempo ainda. “E ta prudente pa tuma e paso aki? Hasta den e eleccion recien na Hulanda, memey di e pandemia, no a pasa pa e sistema digital. Di con nos lo kier trece asina un cambio grandi cu unicamente lo conduci na insiguridad memey di votadonan,” Lejuez a puntra. Mas ainda, e como Parlamentario no a mira e cifranan pa inverti den e ekiponan. “E ta necesario awor aki? Ken ta paga pa tur e mashinnan cu mester bay na e 70 urnanan electoral? Presupuesto 2021, cu a keda presenta despues cu a desmantela Parlamento, no a keda ni trata corda aproba. Mas ainda, un cambio asina drastico den e Ley di Eleccion pa medio di un lbham ta denter autoridad di of ta moralmente responsabel pa un gabinete cu ta demisionario?” Den concepto di e Parlamentario tin demasiado insiguridad mientras cu e proceso di votacion mester por sosode sin ningun tipo di duda. E lo keda pendiente pa e proyecto di ley, manera articulo 57 di e Eleccion di Ley ta prescribi, cu ta specifica e uzo di mashinnan di voto y no un informacion cu ta duna pa medio di un articulo den un medio di comunicacion.

Trabaonan awor di Parlamento

Bon Dia Aruba a puntra Sra. Lejuez ki trabao Parlamento a haci despues cu Gobierno a entrega retiro di e organo. El a splica cu desde 30 di Maart 2021, no tabatin mas reunion publico. Locual si a tuma luga ta un reunion di e Comision Huishoudelijke Aangelegenheden, CHA, encuanto reunionnan pa e proximo temporada, tratamento di Presupuesto 2021, y representacion den Eerste Kamer pa e Geschillenregeling. E reunion aki a tuma luga riba 6 di April. A sigui tres otro reunion pa determina ken ta representa Aruba den e reunion aki. Riba e mesun dia Comision Central a reuni pa determina fecha pa entrega preguntanan por escrito riba Presupuesto 2021. E fecha a keda determina pa Diamars 20 di April 2021. Dia 22 ultimo Comision Central a reuni atrobe pa confirma e preguntanan por escrito pa loke ta trata e ley di Presupuesto di Aruba 2021.

Alan Howell pa Hulanda

“Fuera di esakinan no tin nada definitivo poni riba agenda pa e proximo simannan of lunanan nos dilanti. Por spera cu lo por yama ainda reunion pa trata sea ley di Cannabis medicinal of Presupuesto 2021,” Daphne Lejuez a bisa Bon Dia Aruba.

Ironia ta cu e reunion den Eerste Kamer riba e Geschillenregeling lo ta atendi pa Presidente di Parlamento mr. Ady Thijsen. Y e persona cu oficialmente mester keda encarga cu e organo legislativo durante su ausencia ta Sr. Alan Howell, e mesun persona cu segun Prome Minister Demisionario a kibra cu tur regla di integridad, pa cual motibo mester a desmantela Parlamento.

“ Den CHA lo a dicidi cu tur fraccion mag di manda un representante pa e reunion den Eerste Kamer tocante e geschillenregeling. Di awor caba mi por notifica cu mi persona a opta pa no ta parti di e delegacion aki mirando e gastonan envolvi y tambe cu ta dos persona so lo por bay hiba palabra. Den caso cu Presidente di Parlamento biaha normalmente e Vice Presidente ta keda encarga cu su tarea. Pero den e caso specifico aki, awor Sr. Howell tambe ta lider di fraccion di POR, y tambe tin e opcion di representacion na Hulanda. Si e tambe dicidi di biaha, e ora esun cu mas aña den Parlamento lo tin e tarea pa reemplasa Presidente di Parlamento den su ausencia. Ta lamentabel berdad cu den Parlamento no a hiba un reunion pa trata e status di Sr. Howell, particularmente si mira cu den caso di Sr. Sevinger si a haci esaki y un mayoria a hasta restringi su participacion na biahenan di representacion den exterior,” tabata e splicacion di Daphne Lejuez.

LEAVE A REPLY

Please enter your comment!
Please enter your name here