Proximamente nos parlamento lo por a trata e rapport encuanto e bochornos maneho di gobierno anterior den Refineria di Aruba NV, si lo tabatin reunion. Aunke parlamento ta formalmente den funcion te ora tin un parlamento nobo, e duda ta grandi si lo tin un reunion cu perspectiva di logra haya un mayoria vota pa pasa cualkier ley. Despues di e explosion grandi den partido POR, cu a mira su ministro sali cu destino (des)conoci, igualmente un di su parlamentarionan cu a bira ‘independiente’ y cu e anterior salida di e lider grandi, bao investigacion penal, y su ultimo ministro encarga cu Infrastructura pa nan propio iniciativa, ademas e lider actual, pa default di tur esnan anteriormente menciona, ta dificil imagina cu por predeci cu ta vota sin mas pa proposicion cu ta bin di e partido grandi den e gobierno demisionario. Tambe di e otro partner den e coalicion por spera poco cooperacion, pa e maltrato continuo cu nan a ricibi, terminando tambe den no cumplimento cu legislacion pa introduci produccion y uso di cannabis medicinal, y tambe pa e trabanan encontra riba tereno di enseñanza, pa purba mustra cu e ministro responsable no a funciona bon. Nos ta den campaña caba y no por spera ningun acuerdo a base di razonabilidad mas, pasobra den e tempo nos dilanti tur partido ta trata di proba cu ta e otro a haci malo y cu nan mes ta e superheroe.
A proposito, e proyecto di cannabis ta parce di a topa cu un morto prematuro, di tal forma cu nos no ta tende nada mas. Den e posibilidadnan di reactiva economia y diversifica esaki no a ni menciona e proyecto na IMF, cu por lo tanto a comenta tocante e refineria, pero nada di cannabis cu lo mester a trece miyones aden na belasting di tur tipo. Porfin nan a bin comprende cu ta dificil pa competi den Caribe cu otro paisnan cu a tuma bentaha caba, y ademas no tin e salario minimo na e nivel mas halto den e region aki? Por ta cu, promer cu bay gasta placa na grandi, porfin a yega na e momento di ser empresario y no cantante den e coro politico? Ban spera esey.
Di tur manera, kico tur esaki ta implica? Cu despues di e retiro voluntario di e gabinete di coalicion, ta te despues di 21 di juni lo tin un parlamento cu por bay tuma decision. Esey ta conta pa presupuesto 2021, pero tambe pa eventual cambio den legislacion electoral cu no lo sucede pa un motibo masha simple: e partner grandi den e coalicion demisionario no tin nada di ofrece den e fase di campaña aki, y ni cu nan lo tabatin algo, no ta politicamente sensato pa bay acepta algo asina, kico cu e ta. Ta mas valioso na e momento enfatisa e diferencianan politico cu busca consenso cu na final di dia lo mester cay mas faborable pa esun cu ta dirigi e coalicion demisionario. Di igual manera lo no sucede nada mas cu e rapport di Refineria di Aruba, nada mas cu e uso cu esaki por tin pa e actual campaña electoral. E uso oportuno o oportunista ey no ta kita nada di e seriedad di e caso, pero segun nos opinion e pasonan corectivo no tin pakico di bin di parlamento. Ta e poder ehecutivo mester saca conclusion na promer lugar y cuminza formula legislacion adecuado pa e tema aki, di bon gobernacion corporativo.
Tin un motibo mas pa haci esaki for di poder ehecutivo, y esey ta cu e productonan cu nos a mira den legislacion di iniciativa parlamentario no ta nada di gaba den e ultimo añanan. Nos tur por corda ainda e iniciativa di e actual presidente di Staten y lider di fraccion di e partido grandi den coalicion, cu a pretende cu nan ta hinca e ley di supervision den computer, ta ‘find & replace’ Gobierno di Reino pa “Staten” den e texto y cla ta: Aruba ta libera di supervision di Reino. E tipo di idiotez aki no ta ni apto na nivel di ‘rumshop’ mucho menos di un parlamento cu ta respeta su mes. Seguidamente nos a haya e cambionan den e ley di supervision di partido politico, cu a percura cu pa hopi aña lo no tin supervision efectivo riba loke partidonan politico ta haci cu placa, pasobra ta e propio politiconan mester bay set up henter un aparato administrativo pa Conseho Electoral, loke den tempo di escasez aki lo no sucede. Igualmente nos por mira cu e proyecto di Ombudsman tambe a keda pega, mescos e famoso Bureau y Camara di Integridad.
Kico realmente mester bay sucede na Aruba pa en general gerencia di empresa y otro entidadnan estatal yega na un nivel aceptable? Introduccion di un cuadro legal di Good Corporate Governance pa cada un di nan, y e implementacion estricto di e normanan aki. Basta di nombramento di ruman, primo, (ex-) amante y campañador, sin cu nos por mira nombramento pa cada puesto segun e criterionan profesional di e puesto ey. E cosnan aki den bida real no ta asina dificil, pero aparentemente si ta haci dolor na esnan cu no tin ningun voluntad (politico) pa kibra cu pasado.
