Durante un conferencia di prensa vocero di Departamento di Asunto Social (DAS), Jesseline Kelly a brinda informacion amplio tocante e ayudo financiero adicional cu Gobierno di Aruba ta dunando tur persona den bijstand pa aña escolar 2022-2023.

Kelly a splica cu manera ta custumber, tur aña Gobierno di Aruba ta duna un ayudo financiero extra pa tur persona cu ta ricibi bijstand, cu tin entre 3 y 24 aña di edad y cu ta bishita un scol regular durante dia. E ayudo financiero aki ta consisti di dos tipo; school uitkering (subsidio escolar) y ouderlijke bijdrage (contribucion di mayor).

E subsidio escolar ta destina pa yuda e famia cubri gastonan cu ta encera compra di articulonan di scol. Esaki ta consisti di un suma di 220 florin pa cada persona, pero tin un maximo di 800 florin pa cada famia. E ayudo aki ta wordo paga hunto cu e bijstand di luna di september, cual proximo pago lo ta dia 10 di september.

E contribucion di mayor ta destina pa yuda cubri e gastonan di e contribucion di mayor na cada scol. E suma di e ayudo di contribucion di mayor ta 120 florin pa cada mucha of pa cada persona cu ta bay scol den un famia y suma aki no tin un maximo mara na dje. E suma aki ta wordo paga directamente na e scol.

Kelly a remarca cu si e suma di e contribucion di mayor na e scol ta mas caro cu 120 florin pa e aña escolar, e mayor mes mester paga e diferencia di e suma. Den caso cu e contribucion ta menos cu 120 florin pa aña, e ora loke e suma di e contribucion ta, esey ta loke DAS ta paga na e scol.

Personanan cu ta bin na remarke pa e ayudo financiero extra aki ta tur persona cu tin entre 3 y 24 aña di edad cu ta cobra bijstand normal of cu ta cobra guns uitkering, cu ta e bijstand pa personanan cu limitacion y cu tabata riba payroll di bijstand den luna di augustus. E persona mester bay un scol regular durante dia, sea scol preparatorio, scol basico, scol secundario, middag MAVO of scol Dun’Un Man y e persona mester ta ricibiendo tambe e 250 florin di toelage mensualmente.

Entrante 19 di augustus e persona- of mayornan cu ta bin na remarke pa e ayudo financiero extra por acudi na e scol pa busca e formulario di declaracion di scol di Departamento di Asunto Social, mester yena esaki full y corectamente y entrega esaki segun e schedule di entrega cu e persona a ricibi ora cu el a cobra bijstand den luna di augustus.

Kelly a sigui splica cu DAS a reparti e entrega di e declaracion di scol segun e letter riba e carnet di bijstand pa asina esaki por bay organisa y structura cuminsando dialuna 22 di augustus te cu diabierna 26 di augustus. Riba e ultimo dia, esta diabierna 26 di augustus DAS ta duna un biaha mas e oportunidad den caso cu si pa un motibo of otro un persona no por a acudi ariba e dia stipula segun e letter di su carnet di bijstand, pa pasa Departamento di Asunto Social na San Nicolas, ex-Centro Medico y entrega esaki. Tur declaracion mester wordo entrega na San Nicolas.

Kelly a subraya cu den caso cu no cumpli cu e entrega di e documentonan necesario, e bijstand di e persona pa luna di september ta wordo reduci, pasobra tin personanan den e famia cu ta ricibi e 250 florin toelage cu no ta bay hay’e mas, pasobra e toelage ey ta solamente pa personanan cu ta bay scol. Den caso cu no entrega e comprobante cu un persona den famia ta bay scol, ta perde e toelage aki.

Tambe el a agrega den caso cu entrega e comprobante laat, despues di dia 26 di augustus, e bijstand ta wordo ahusta, pero sin forsa retroactivo. Esaki kiermen e persona ta perde e luna di september y ta perde e ayudo financiero aki cu solamente ta wordo duna dia 10 di september.

Kelly a subraya cu den caso cu tin hendenan riba 24 aña di edad cu ta cobra bijstand cu ta bay scol, e persona mester pidi e declaracion di scol na e scol cu e ta acudi. Por ehempel si un persona tin 27 aña y ta bay Universidad di Aruba, e ta haya dispensacion di DPL, pero mester entrega e declaracion di scol na DAS como prueba cu e ta bay scol pa e aña escolar 2022-2023

Contestando e pregunta pakico nan ta warda te ora despues cu scol cuminsa pa duna e ayudo financiero extra aki, Kelly a splica cu nan ta warda te ora cu scol cuminsa pasobra e ora ey nan tin e prueba cu e mucha en berdad ta inscribi na scol. El comenta cu hopi biaha ta pasa cu e famia no ta avisa DAS cu e mucha a cambia di scol y nan mester haci esaki. Ademas nan mester tin un prueba cu e scol ta bisa cu pa aña escolar 2022-2023 tal mucha ta a inscribi na e scol.

Por ultimo, Kelly a enfatisa cu e peticion pa e ayudo financiero extra aki ta keda un responsabilidad di cada famia pa atende cune. “Nos departamento ta informa kico bo por haya si bo cumpli, pero un biaha mas e ta den man di cada famia pa cumpli cu e rekisitonan aki, cumpli cu e deadline. Nos ta pidi pa cumpli pa asina nos di seccion di bijstand por cumpli cu e famia”, el a bisa.

Kelly a tuma e oportunidad pa informa comunidad cu DAS a tuma nota den e ultimo dianan aki den medionan di comunicacion cu tabatin diferente reclamo tocante cu no ta contesta telefon na oficina. El a splica cu actualmente nan departamento tin un problema tecnico y Setar hunto cu nan seccion di ICT ta trahando riba esaki. Pa otro siman e personanan cu ta cobra bijstand tin cu entrega e declaracionnan di scol y nan mester wordo hinca den e sistema.