For di comienso di juli 2021 cu e variante Delta a haci su entrada na Aruba, hopi lihe e variante aki a causa preocupacion na momento cu el a plama, causando un brote grandi di casonan di COVID-19.

Segun DVG, a categorisa e variante Delta a como un variante mas contagioso compara cu otro variantenan y esaki nos por a experencia tambe na Aruba na momento di haci comparacion cu e brotenan anterior di COVID-19.

Te cu dia 12 di september 2021, nos tin na Aruba un total di 70.105 (75%) asegurado di AZV riba 12 aña cu si a vacuna y 23.668 (25%) asegurado di AZV cu no a vacuna.
E informacion aki ta hopi importante pa analisa: di e 70.105 (75%) cu si a vacuna, 42 persona a drenta hospital relaciona cu COVID; y di 23.668 (25%) cu no a vacuna, 219 persona a drenta hospital for di cuminsamento di juli te cu dia 12 di september.

Si nos recapitula tur data for di 1 juli 2021 te cu 12 di september 2021, nos por conclui cu pa cada 10.000 ciudadano cu no a vacuna, 92 a ta drenta hospital relaciona cu COVID-19; y pa cada 10.000 ciudadano cu si a vacuna, 6 persona a drenta hospital relaciona cu COVID.

E analisis aki ta basa riba cifranan di asegurado di AZV. Motibo cu ta usa cifranan di AZV pa e analisis aki ta pa motibo cu e cifranan registra ta logra un analisis cu un resultado real y confiabel. E cifranan aki no ta inclui hende indocumenta of studiante di afo cu a vacuna of cu por vacuna ya cu aki no tin exactitud y e midimento lo bira un calculacion proyecta.

Pa medio di analisis continuo, DVG ta sigui evalua y dirigi su maneho di vacunacion cu segun e departamento di Salubridad Publico, ta demostrando di ta hopi efectivo den preveni ingreso den hospital y hasta den scapa bida di nos ciudadanonan.

Otro fayecido

Ademas, den su resumen di ayera, DVG a informa cu lamentablemente un residente mas a perde bataya contra Covid-19. Cu esaki, e cantidad total di fayecido relaciona cu Covid-19 na Aruba ta 156.

Segun resumen di DVG ayera 27 persona a recupera, mientras a registra un total di 37 caso nobo di Covid-19, di cual tres no ta residente. E cifranan aki ta representa un tasa di positividad entre nos residentenan di 11 porciento. E cantidad di caso activo ayera tabata 330.

Datonan ta ilustra casonan nobo di Covid cu un averahe semanal di 31 caso pa dia y un averahe di tasa di positividad semanal di 13 porciento pa dia.

Actualmente na Aruba tin 31 persona hospitalisa na Hospital Dr. Horacio Oduber debi na Covid, di cual 8 ta den Unidad di Cuido Intensivo ICU y 23 riba piso general. Ademas na Colombia tin 24 pashent di Aruba hospitalisa den ICU.

LEAVE A REPLY

Please enter your comment!
Please enter your name here