Dialuna dia 6 y diamars dia 7 di mei binidero, lo tuma luga na tur scol basico di Aruba e ‘Nationale Doorstroomtoets’ pa tur mucha den klas 6. Esaki como parti di un maneho nobo pa cu e procedura di fluho pa scol avansa.

Alumunonan cu ta sali di scol basico y ta continua nan carera escolar na un scol avansa, ta ricibi un asina yama ‘schooladvies’ pa indica si e carera escolar mester sigui na EPB, SPO, MAVO of HAVO/VWO. E conseho aki ta wordo duna a base di nan rapportnan y desaroyo durante nan carera escolar na scol basico. Den pasado, ta alumnonan cu un ‘schooladvies’ pa HAVO/VWO so tabata haci e asina yama ‘toelatingstoets’ pa por drenta Colegio Arubano of Colegio San Nicolas.

A base di e pensamento di ‘equidad’ y ‘inclusion’, manera ta describi den e Sustainable Development Goal (SDG) # 4 di Nacionnan Uni (United Nations), e maneho nobo ta duna oportunidad na tur mucha den klas 6 di scol basico pa participa na e ‘nationale doorstroomtoets’, pa asina sostene e ‘schooladvies’.

E base di e maneho ta cu e ‘doorstroomtoets’ ta sostene e ‘schooladvies’.

Si surgi e situacion cu e ‘schooladvies’ ta indica un nivel mas halto cu e ‘doorstroomtoets’, e alumno por drenta un scol di e nivel di e ‘schooladvies’ toch.

Den caso cu ta e ‘doorstroomtoets’ cu ta indica un nivel mas halto cu e ‘schooladvies’, e maneho ta indica cu e alumno por drenta un scol avansa na e nivel cu e ‘doorstroomtoets’ ta indica. E principio ta cu di e 2 instrumentonan, ‘schooladvies’ y ‘doorstroomtoets’, esun cu ta indica e nivel mas halto ta esun cu ta conta pa e alumno por drenta un scol avansa.

Den ley (Landsbesluit dagscholen v.w.o., h.a.v.o., ma.v.o. (AB 1999 No.62) ta indica cu un ‘ontvangende school’, pues e scol avansa, por stipula su mesun criterio pa por drenta e scol, esaki ta algo cu por diferencia pa cada directiva di scol. Esey tin como consecuencia cu si un directiva di scol pone como criterio cu e schooladvies y doorstroomtoets mester indica e mesun nivel di scol avansa pa por drenta dicho scol, pa ley e directiva di scol tin derecho pa haci esaki. E alumno lo mester scoge pa bay un otro scol di un otro directiva di scol.

Na Aruba nos conoce 2 directiva di scol cu ta ofrece enseñansa pa HAVO/VWO, esaki nan ta SMOA (Colegio Arubano) y Dienst Publieke Scholen (Colegio San Nicolas).

Pa MAVO tin SKOA (Colegio San Antonio, La Salle College, Maria College, Filomena College y Colegio San Augustin), DPS (C.G. Abraham de Veer, Ceque College y Juliana School) y SPCOA (Mon Plaisir College y John Wesley College).

Pa Enseñansa Profesional Basico nos tin SEPB (EPB San Nicolas y EPB Hato) y pa scol avansa special nos tin DPS (SPO Santa Cruz y SPO Savaneta).

E paso di scol basico pa scol avansa ta uno hopi grandi, y tin hopi influencia riba e carera escolar di un hoben. Pa e motibo aki, ta importante pa e mayornan y e maestronan di scol basico comunica bon cu otro, y tene cuenta cu e situacion di cada alumno individual, pa asina haci e escogencia cu lo beneficia e alumno mas hopi, y cu lo sostene su desaroyo intelectual y social- emocional.

Ministerio di Enseñansa y Departamento di Enseñansa Aruba ta haci uzo di e oportunidad aki pa desea tur alumno di klas 6 hopi exito cu e ‘nationale doorstroomtoets’ y un carera fructifero na scol avansa.

Pa mas informacion por acudi na nos website [ea.aw] y busca Nationale Doorstroomtoets. Tambe por sigui desaroyonan relaciona cu Enseñansa na Aruba a traves di Facebook, Twitter y Instagram @educationaruba.