Debate den Tweede Kamer tocante falta di ley di supervision financiero na Aruba

Segun medionan di comunicacion den Reino, e siman aki Tweede Kamer di Parlamento Hulandes ta bay tene un debate di dos minuut tocante ley pa supervision financiero na Aruba. Ta yama e debatenan asina pasobra cada fraccion tin dos minuut pa papia, y e intencion ta pa entrega mocion.

E debate tocante Aruba ta trata e falta di ley di reino pa supervision financiero na Aruba, segun portal Curasoleño, CuraçaoChronicle a reporta, y e disponibilidad di Secretario di Estado pa Relacionnan di Reino, Alexandra van Huffelen pa refinancia e prestamo di coronavirus cu ta vence na october, a pesar di e falta di e ley.

Relaciona cu e intencion di Tweede Kamer pa tene cuenta cu e diferencia di orario na momento di planea debate riba temanan relaciona cu e parti Caribense di Reino, a haci tiki progreso. Esnan cu sigui e debatenan via transmision en bibo for di e listanan ta bay tin cu lanta trempan diaranson.

E debate aki a keda solicita pa Parlamentario di VVD, Roelien Kamminga. E ta molesto pa e hecho cu Van Huffelen a elimina e condicion cu Aruba lo cualifica pa refinanciamento di e prestamo di likides solamente si e ley di reino riba supervision financiero pa Aruba ta na vigor, segun Dossier Koningrijkrelaties.

Na 2021, Hulanda y Aruba a yega na un acuerdo pa converti e Ordenansa di Supervision Financiero pa Aruba actual den un ley di reino. E propuesta di legislacion a keda entrega na e parlamentonan cu permiso di gabinete Wever-Croes na februari di aña pasa. Desde e tempo ey, e discusion a yega na un impasse: Gobierno di Aruba a reconsidera y ya no kier un ley di reino mas.

E menasa di Van Huffelen cu no ta bay tin discusion di extende e prestamo di likides cu ta vence dia 10 di october no a causa gran impresion na Oranjestad. Den e ultimo debate di e comite, e Secretario di Estado a sorprende e miembronan di Tweede Kamer na momento cu el a declara cu e ta dispuesto pa refinancia e prestamo hasta sin e ley di reino, maske no na un tasa di interes abao, sino na tasa di mercado. A bira cla cu Aruba tampoco ta preocupa cu esaki.

E debate di dos minuut ta permiti e fraccionnan entrega mocion. Kamminga a anuncia cu e tin intencion pa haci uso di e oportunidad aki. No ta conoci si otro Parlamentario Hulandes ta considerando pa tambe entrega un mocion.