Debate tocante pensionado… Ta habri campaña…?

Gobierno a anuncia cu entrante 2024 ta aumenta e sumanan pa e diferente categorianan di pension. Un aumento necesario mirando desaroyo di aumento di costo di bida, bao influencia di inflacion despues di e crisis di Covid, y e guera ainda andando na Ucrania. Tambe a anuncia otro alivio pa e pensionadonan den forma di reduccion di e porcentahe cu e pensionado ta paga pa AZV.

Cu e aumento aki naturalmente ta keda un diferencia basta grandi ainda entre e nivel di pension y e ‘bestaansminimum’, e minimo calcula pa CBS Aruba cu cada persona individual o famia di difereente composicion mester minimamente pa nan por subsisti. Esaki no ta critica di nos banda pasobra e diferencia ey no por keda elimina tumando medida na e momento aki. Ta importante pa mira e aumento actual como un medida cu mester cuadra cu e realidad financiero di e fondo cu mester carga e aumento. Nos por conclui for di e accion gubernamental cu esey lo ta e caso anto, pero no por averigua pa nos mes con saludable e situacion di e fondo di pension ta. Nos ta topa cu un problema: no tin cifra despues di 2020 riba website di SVb pasobra no a publica cuenta anual despues di e aña ey. Pues hustamente con e fondo a recupera den ultimo añanan no ta visible. Loke si por bisa cu den e añanan anterior na 2020 e fondo tabata acumulando reserva di mas di Afl. 30 miyon pa aña. Pa mas contexto: na 2019 e gastonan di AOV tabata na alrededor di Afl. 256 miyon y na 2020 esey a subi te Afl. 263 miyon. Den e ultimo añanan e cantidad di empleo registra a recupera e alrededor di 3.000 empleo perdi den e crisis y na 2024 ta na sigur 2.000 empleo mas, na mas di 45.000 empleo actualmente registra. Por lo tanto, tin un base basta solido pa por aumenta pension, tumando na cuenta cu e aña aki ainda tin e efecto limitante di e medida tuma 10 aña pasa pa bay di 60 pa 65 aña di edad di pension.

Anto, awor, tur hende contento y nos por bay drumi tranquil? No, pasobra mester bay mas den detaye den e asunto aki. Ban cuminza cu puntra kico ta e tendencia poblacional den e proximo añanan cu cual mester tene cuenta. Desde 2025, si no tin ningun medida, e aumento anual di e poblacion cu ta yega edad di pension ta bay crece bastante mas rapido cu den e decada cu ta culmina e aña aki. Y kico ta e caso? Cu den e proximo decada ta e ‘cohortnan’ mas grandi di henter nos poblacion ta bay yega na edad di pension. Na fin di 2023 nos por mira cu e cohort di 65 – 69 aña tabata di 7.169 persona, mientra esun di 60 – 64 aña ta di 8.537. Tambe e dos cohortnan inmediatamente bao di esaki, tambe ta di riba 8.000 persona cada un. Esakinan den henter e structura poblacional ta e unico tres cohortnan riba 8.000 persona; e parti gordo di envehecimento…

Kico tur esaki ta bisa nos? Cu, aunke e medida di aumenta edad gradualmente den ultimo 10 aña a yuda mantene e fondo saludable, salvo e problema di e crisis di Covid, nos lo mester papia con ta atende e asunto aki den e proximo añanan. No ta pornada Hulanda a trece e tema aki caba den e consulta pa e Landspakket y a acorda cu, si no tin otro forma pa financia loke ta biniendo pa nos, lo mester contempla bay pa 66 aña pa edad di pension.

Y kico nos ta mira riba escenario politico na e momento aki? Gobierno ta anuncia aumento di pension y no ta toca e tema di kico mester haci den futuro cercano. Y e partido rival grandi den oposicion ta anuncia cu otro aña nan ta bay aumenta pension cu 50% via aumento di e ‘reparatietoeslag’ cual ta simplemente un suma grandi extra riba presupuesto. Si nos por anticipa cu e suma total di gasto di AOV ta yegando Afl. 300 miyon pa aña, 50% lo significa anto Afl. 150 miyon extra riba presupuesto… Obviamente, nos ta den campaña electoral caba y aparentemente en todo caso e partido menciona a scoge su cabay di campaña caba.

Sin duda algun e actual coalicion lo tin nan contesta caba pa e ‘move’ aki di e contrincante principal. Esey riba su mes no ta e problema; e problema ta cu nos ta bay mira un debate unda ambos ta purba gana voto…, sin deseo di conta nos henter e storia. Ambos lo kier evita ccu mester debati e eventual escogencia pa bay 66 aña, loke logicamente lo no ta un anuncio agradable pa un partido politico bay haci. Y si en berdad e desaroyo economico y financiero ta mustra cu tin alternativa, ‘que asi sea’. Sin embargo, no ta bon si nos como ciudadano ta keda sin haya e informacion necesario pa por huzga na un manera sensato kico por y kico no por. Y pa esey ta necesario cu e informacion ey, e proyeccionnan demografico y e cifranan financiero corespondiente, aparece riba mesa. De paso dirigencia di SVb por haci nos e fabor di practica e transparencia cu ultimo añanan a bay perdi, sin splicacion algun, y pone e cuentanan anual di e añanan faltante riba nan, por lo demas excelente website. Pension ta tema importante, sigur cu eleccion den porta, pero no por tin debate den bashi, pa mas cu hopi di nos politiconan gusta esey.