Diamars abogado di ex- presidente Toledo, Heriberto Benitez a presenta un recurso di apelacion contra orden di prizon preventivo pa 18 luna, cu hues Concepcion Carhuancho a dicta. E medida aki a sali for di investigacion den caso di soborno cu Toledo Manrique lo a haya di Odebrecht.

Den dialogo cu miembro di prensa, e ex-congresista a splica cu den apelacion di e decision di corte, el a considera e argumento tocante derecho humano. El a solicita un cambio den ordo di prizon preventivo pa medida di comparecencia. “Pa evita tur scandal cu tin awor pa motibo di ordo di captura internacional, nan ta papia di extradicion, deportacion. Tur cos por keda elimina si e sala penal por evalua e expediente y asina dicidi pa kita ordo di prizon preventivo”, el a informa.

Benitez a bisa cu un hues lo valora e solicitud di defensa y lo convoca un audiencia den 15 dia, manera ta estableci den codigo penal. Benitez a bisa cu nan a pone un abogado mas, pa colabora cu defensa di ex-presidente. E abogado a ser consulta tambe tocante e paradero di Alejandro Toledo, cu según ministerio publico a bisa ta na California, Merca. Benitez a bisa cu ta parti di su strategia di no duna di conoce e paradero di Toledo.

Heriberto Benitez a papia tocante “interferencia politica” relaciona cu caso di Toledo. Benitez a papia por ehemplo di “cu presidente Pedro Pablo Kuczynski a comunica na presidente Donald Trump pa solicita posibilidad di deportacion pa Toledo. El a bisa tambe cu ministerio publico a publica e cara di nan persona defendi, cu un documento cu no ta autorisa ainda.”