Como preparacion pa e Weganan Sur Americano Hubenil 2017 cu lo tuma luga dentro di un luna na e ciudad Santiago capital di Chile, e federacion di tennis a manda cuater atleta prospecto atende un campeonato di entrenamento di nivel halto na Argentina.
E cuater atletanan aki tabata Patrick y Frederick Sydow, Evelyanne Kelly y Kayla Solagnier cu bou guia di entrenador di e seleccion Claudio Martinez a haya un preparacion mas intensivo na Argentina. Mester bisa cu e atletanan prospecto aki tin hopi luna di preparacion tras di lomba pa asina ta den e miho forma posibel pa e weganan Odesur hubenil.
E cuater tenistanan aki ya tin nan experiencia internacional cu varios torneo hunga. Nan logronan den e region di Caribe ta resalta sigur den e categoria masculino unda na aña 2015, e seleccion masculino tabata triunfante den e competencia Junior Davis Cup Pre-Qualifying Central American & Caribbean Zone cu a tuma luga na El Salvador. Tabata pa prome biaha cu nos tenistanan a logra gana e premio maximo desde nos participacion cu a cuminsa na 1985. Tambe e tenista femenino Kayla Solagnier a luci y conoce un tremendo aña 2016 unda e la titula campeon den e Open Tennis Championship na Corsou.
