Diabierna ultimo, durante un reunion cu Algemene Ziektekosten Verzekering (AZV), Conseho di Minister a ricibi un presentacion di e departamento, pa asina haya un bista riba e situacion financiero di AZV.
Prome Minister Evelyn Wever-Croes a indica den un comunicado di prensa cu durante e reunion a bin dilanti e condicion cu Hulanda a pone durante e pandemia, pa corta Afl. 60 miyon den AZV, pa asina Aruba por haya placa fia pa yuda esnan cu mas a wordo afecta pa e pandemia. E condicion aki a trece su consecuencianan den cuido di salud, pero a pone cu AZV a bay traha riba un modelo di con pa baha gasto di cuido riba termino largo. E comunicado ta enfatisa cu Aruba su poblacion ta embeheciendo, y ta esnan mas halto di edad ta esnan cu mas ta haci uso di nos cuido medico, consecuentemente e gastonan ta sigui subi.
Segun e comunicado, meta di Gobierno ta pa tin un fondo di AZV solido, pa asina por sigui brinda e cuido basico y provee e remedinan basico cu tin mester. Prome Minister a expresa cu e modelo financiero presenta pa AZV, proyectando con e gastonan ta bay ta, ta hopi impresionante. Tambe nan a duna mas informacion di e acuerdonan nobo cu nan ta cerando cu esnan cu ta duna e servicio medico pa asina garantisa un bon cuido di salud. Sinembargo, no a comparti mas detaye.
Prome Minister a indica cu a base di e reunion aki lo sigui cu deliberacionnan cu Hulanda y CAft pa asina por yega na un protocol nobo entre Gobierno y AZV pa e siguiente añanan. Esaki lo trece claridad tanto pa Gobierno y AZV y na mes momento riba e posicion di Hulanda.
