Cada tanto tempo nos comunidad ta manece cu un noticia sumamente impactante, manera den e dianan aki a bolbe sucede. Un mucha muher den flor di su bida a topa cu un morto prematuro, na man supuestamente di dos hoben di menos edad ainda. E asesinato a tuma lugar cu un arma di candela, loke atrobe lo lanta e discusion tocante disponibilidad amplio di arma na e momento aki. Y unavez tin arma disponible, e probabilidad cu ta usa nan ta bira tanto vez mas grandi. Ta na e autoridadnan concerni pa bin cu un maneho con pa limita presencia di arma riba nos isla. No mester carga speranza cu esey lo caba cu e fenomeno, e ta un tarea continuo.

Pero esey ta djis un aspecto. Mas preocupante ta e hecho cu na un edad asina tempran ya hobennan ta haya nan mes den actividad delictivo cu di mes ta yama violencia. Kico ta haci cu un hoben cu ta scoge e caminda aki? Ta dificil pa penetra den un caso individual y evalua tur e factornan cu a hunga un papel den e caso particular ey. Maneho semper lo ta basa mas tanto riba factornan cu ta indica un denominacion comun, e condicionnan cu ta interveni pero no semper ta defini e accion di e persona individual. Cu esey nos ta core otro riesgo pasobra nos por keda pega den indica circunstancia cu por hunga un papel, pero no necesariamente ta haci esey den e caso individual. Esey ta e riesgo ora nos ta indica cierto factornan general como importante o clave den e caso individual mientras nan no ta, no semper en todo caso. Esey ta e caso por ehemplo ora nos ta papia di factornan manera pobreza, famia di un solo mayor, educacion minimo, etc. No tur hende cu lanta den un situacion familiar problematico, sea cu ta di pobreza o di poco guia paternal, ta subi e caminda di delincuencia, es mas, mayoria no ta haci esey.

Sin embargo, no por desmenti cu di tur manera nos mester, como comunidad, trata di elimina e factornan negativo aki, y ni sikiera na promer lugar pa preveni cu nos tin hoben cu ta bay den delincuencia, pero simplemente pa e hecho cu nan no ta haya un oportunidad igual pa logra algo den bida. Den un sociedad unda habilidad y prestacion ta norma importante pa logra prosperidad material, cuminza cu un educacion pober ya ta pone hende den un situacion di desigualdad. Ta bin e pregunta dilanti kico ta faltando anto den nos comunidad cu nos tin un grupo creciente di hoben cu tin tendencia pa bay den e direccion robez. Y tambe kico nos mester haci pa mehora e situacion ey. Mas di un biaha nos a trata e tema caba di e situacion den cual hopi hoben ta lanta, unda nan no tin suficiente guia y supervision. Esaki no ta necesariamente e famianan di un solo mayor, pasobra den un famia supuestamente ehemplar, cu un pareha di mayor, hopi cos por bay robez tambe, cu resultado cu e yiu no ta lanta den un situacion faborable tampoco.

Aki nos ta bolbe enfatisa e necesidad di crea manera di aumenta guia y supervision, sin laga e asunto na un sermon pa e mama y tatanan cu no ta logra esey. Mientras tanto nos mester por a comprende cu esey no ta suficiente y cu comunidad mester ‘step in’ y complementa e esfuerzo di e mayornan. Esey lo no ta solamente bon pa esnan unda e guia y supervision ta faya, pero no ta haci daño na e otronan, cu tambe mester un ambiente optimal di socialisacion. Nos por a ripara esey den e aña di pandemia aki, cuanto efecto negativo e isolacion di nos hobennan a trece cune, faltando scol pa varios luna y limitando nan interaccion social. Nos mester yega na e conclusion cu ta necesario crea e condicionnan cu un famia individual no por crea pa nan mes.

Y kico ta nos preocupacion principal den tur esaki? Cu nos ta den pleno campaña electoral y casi tur partido ta mustra riba e rol esencial di educacion den nos comunidad. Esey ta bunita y ademas corecto, pero pakico nos ta tende asina poco di e papel di e educacion cu no ta limita na e orario escolar? Nos ta aplaudi cu ta surgi proyectonan manera ‘Leerorkest’ cu ta un di e instrumentonan conoci pa yega na curazon di cualkier hoben, pa duna nan un extra guia y motivacion pa desaroya y mehora nan mes, y cu de paso lo tene nan leu di delincuencia. Duna sentido y guia na nos hobennan, di esey e ta trata, semper. Loke ta haci dolor, sin embargo, cu e iniciativanan aki no ta bin gracias na, sino a pesar cu no tin un maneho general di stimulacion y propagacion di e tipo di actividadnan aki. Nos no ta tende y nos no ta sintie tampoco, no tin un afan comun pa reconoce y apoya e iniciativanan aki di un manera mas structura. Un maneho cu mester tin su expresion mas halto den loke un gobierno ta planifica y, esey ta mas importante ainda, ‘put your money where your mouth is’. Stop di trata iniciativa valioso di ‘wel leuk’ y traha alrededor di nan un maneho nacional adecua.

LEAVE A REPLY

Please enter your comment!
Please enter your name here