Lider di Fraccion di POR den Parlamento, Dellanire Maduro a pone hopi enfasis riba e importancia di tin den e curiculo escolar educacion sexual. Esaki mester wordo haci uzando un lenguahe y contenido apropia pa e diferente edadnan di e mucha/hobennan.

E ta referi aki no solamente pa educa nos muchanan y hobennan riba relacion sexual, pero tambe e parti di seduccion, pedofilia, intimidad, incest, manipulacion, pornografia, ofensa sexual, secreto, internet, cu un persona por pidi nan pa manda potret of video. Tambe na ki momento ta bisa no y na ki momento ta bisa si y e implicacion di e respuesta aki, specialmente si tene na cuenta cu hopi ta esnan cu ta cuminsa tene relacion sexual prome cu nan haci 18 aña.

“Tur e topiconan aki mester wordo brinda na un manera apropia pa nan edad. No solamente e parti sexual, pero tambe kico ta significa ora bo ta namora, cual ta nan derecho como mucha y tambe e parti di leynan”, Dellanire Maduro a indica.

E ta bisa esaki pasobra hopi biaha ta scucha cu na momento cu un acto asina grave tuma luga, e persona door di e sentimento cu e ta sinti (un forma di vies), sin cu e sa por elimina evidencia cu lo por wordo uza pa e castigo cu e agresor lo mester haya. “Ta importante pa empodera nos muchanan riba e topico aki cu ta hopi fastioso, pero ta miho pa nan sa di esaki y evita cu un posibel evidencia por wordo elimina”.

Den e cuadro aki Fraccion di POR a presenta un mocion sosteni pa demas parlamentarionan cu ta urgi gobierno pa inclui den e curiculo escolar di educacion preescolar, basico y secundario un vak di ‘prevencion di tur tipo di abuso’ adapta pa cada edad pa asina nos muchanan y hobennan ta bon informa di forma structural y nacional.

Finalisando Dellanire Maduro a bisa cu esaki ta un paso apart di aumenta castigo maximo y mehoracion di e proceso na momento cu presenta un caso di abuso.

1 COMMENT

  1. Mi a tende storianan di mas troci di abuso sexual, e pedofiel ta un chance taker. E chance nan ey mester lucha pa evita: aumento di castigo no ta bai stop e pedofiel, mester minimaliza su chance door di maximaliza cuido di mucha. Hopi ta esnan cu ta grita den manifestashon, pero, nan ta keda cas wak pa nan yiunan? Hopi hende ta haya yiu y mentalmente ta keda e teenager cu kier trip cu friends, dicon barnan ta yen casi tur dia. No por bende droga bai sera y grita un hende a mishi cu mi yiu, y hope cu consenshi no remorde, no, e consenshi MESTER remorde e mayornan tambe, y puntra bo mes, con mi a faya, kiko mi mester cambia. E cambio mester bini di e comunidad, cada ken sinja wac pa su yiu: podise awor cu no tin trabou hende por realisa esey.

LEAVE A REPLY

Please enter your comment!
Please enter your name here