E actriz y cantante Demi Lovato, di 28 aña di edad, a bolbe sorprende su mas di 93 miyon siguido riba Instagram cu un publicacion den cual e ta conta su experiencia di observa y tuma contacto cu extraterrestrenan.
Lovato a comparti un video y tres potret como ‘evidencia’ di loke el a conta. “Esaki ta djis algun di e pruebanan bao di streanan, den shelo di desierto, cu ya no por ignora y mester wordo comparti di inmediato.”
“Durante ultimo dos luna mi a profundisa den ciencia di consciencia y mi a experimenta no solamente paz y serenidad manera mi nunca a yega di conoce, sino tambe mi tabata testigo di observacionnan mas increiblemente profundo, tanto den shelo como algun meter for di mi”, e artista a splica papiando tocante algun ‘retiro’ cu el a realisa den Parke Nacional di Joshua Tree na California.
Mas leu di e burla of critica cu el a ricibi di algun siguido, e cantante ta convenci di a mira extraterrestre y di a comunica cu nan. Lovato tambe a anima su siguidonan pa uni na ‘e berdad tocante bida extraterestre’: “E planeta aki ta riba un caminda hopi negativo pa destruccion, pero nos por cambia esey hunto. Si nos logra cu 1% di e poblacion medita y establece contacto, nos lo obliga nos gobiernonan reconoce e berdad tocante bida extraterrestre entre nos y cambia nos habitonan destructivo cu ta destruyendo nos planeta.”
Lovato a ricibi tur tipo di comentario pa su publicacion. Hopi a mustra preocupa y a consulta si e ta okay. Mester corda cu Lovato apenas un luna pasa a termina su compromiso cu e actor Max Ehrich y cu tabata obhetivo di acusacionnan duro na man di Ehrich. Ademas el a pasa momentonan hopi dificil pa su trastornonan alimentario y su adiccion na droga; na 2018 e tabata cera di muri pa un sobredosis di opioide.
Lovato a termina su post recomendando su siguidonan purba tuma contacto cu aliens usando appnan mobil.
