Un aña despues (27 juni 2015) e detencion fatal di Mitch Henriquez, un grupo di accion MAD Mothers ta organisa un demonstracion. Nan kier protesta contra discriminacion y racismo pero tambe kier recorda Mitch Henriquez. E demonstracion lo tuma luga na Holland Spoor, Den Haag. Esaki ta cerca di Schilderwijk unda aña pasa protesta contra e morto di Mitch a desemboca den un disturbio grandi pa varios dia den e bario aki.
Pa motibo di esaki polis ta preocupa awor cu e demonstracion. Nan ta lamenta esaki pa motibo tambe cu e ultimo aña a logra hopi hunto cu e habitantenan di e bario, pa entre otro mehora e siguridad. Asina hefe di polis Paul van Musscher ta bisa RTL Nieuws.
Famia ta lamenta tardansa husticia
Famia di Mitch Henriquez a bisa Telegraaf cu nan ta spera e demonstracion awe lo no sali for di man manera aña pasa. Segun primo di Mitch cu ta biba na Hulanda, Alex Dijkhoff, nan tin e miedo pasobra hopi organisacion a acerca nan den e ultimo simannan. Organisacionnan cu ta mira e morto di Mitch como un caso di racismo.
Primo Dijkhoff tambe ta lamenta e tardansa di banda di husticia Hulandes pa cu e caso contra e cinco polisnan sospecha di e detencion fatal di Mitch Henriquez. Husticia a priminti cu e caso lo no tuma mas cu un aña, segun e primo. E no ta compronde e ora dicon un aña a pasa y e caso ni a yega corte ainda mientrastanto e investigacion hudicial a keda finalisa pa basta tempo caba.
(riba potret e mama di Mitch Henriquez, cu ta biba na Aruba)
