Directiva actual di Asociacion Amigos de Colombia (ASOCOL), presidi pa Moises Fernandez ta invita tur miembro y no miembro di e asociacion aki, pa uni nan mes na nan actividadnan cu ta organisado den cuadro di celebracion di Pasco y Fin di Aña.

E aña aki nan ta organisando un biaha mas e Nobena di Pasco di Nacemento riba asina yama Plasa di Gradicimento, of Plasa di E Condor. Pa realisa e nobena aki, nan ta bin mañan dia 17 di november cu un accion di limpiesa ariba e plasa aki, situa dilanti di PriceSmart. Unabes cu nan ta bin cla cu e limpiesa di e plasa, nan lo cuminsa cu e trabou di decoracion di e kerstboom gigante cu tin instala den e sitio aki, pero tambe rond di e plasa.

Fernandez a declara na Bon Dia Aruba cu e kier haci yamada na tur esunnan cu tin decoracion y luz di Pasco den bon condicion, pero cu e aña aki nan no ta bay uza nan of nan ta bay cambia nan, ya cu e asociacion por ricibi nan como donacion.

Igualmente hende cu ta disponibel y kier bin yuda nan pa haci limpi e plasa, pero tambe esunnan cu kier colabora durante e nobena, nan ta bonbini. Tambe el a laga sa cu mescos cu e ultimo dos aña, nan lo cuminsa cu un campaña di recaudacion di regalo pa reparti cu e muchanan cu ta celebra cu nan e dia di Pasco di Nacemento.

Semper nan ta haci e tradicional entrega di regalo dia 24 di december riba e plasa di Gradicimento of Plasa di E Condor, unabes cu ta culmina e Nobena di Pasco di Nacemento. Tur esunnan interesa por tuma contacto via nan pagina di Facebook: Asocol Aruba. Tambe libremente nan por manda nan mensahe via WhatsApp na e cel. 593-0334.

“E intencion tras di e accion di limpiesa aki, pero tambe cu organisacion di e nobena, ta pa tur hende por colabora. Ya cu tur aña e nobena a bira mas grandi. Sigur e aña aki e cantidad di muchanan lo bira dobel,” el a bisa.

Pero no solamente e muchanan ta participa di nan actividad, sino hendenan adulto cu ta bin pa realisa e nobena. P’esey nan tin mester di mas apoyo fisico y economico. Nan lo bay pone box den diferente establecimento comercial cu un logo di Asocol. Asina tur hende lo por haci nan donacion cu lo yuda alivia varios gasto, entre nan di huurmento di stoel, tent, zonido, etc.

 

LEAVE A REPLY

Please enter your comment!
Please enter your name here