Nos a caba di drenta temporada di horcan cu –segun pronostico- lo mustra mas intensivo of activo cu aña pasa. Sra. Marieta Wanopa di Cruz Cora Aruba a declara na Bon Dia Aruba cu semper e organisacion aki ta bon prepara pa atende cu calamidadnan.
“E ta un organisacion cu ta prepara pa tur sorto di calamidad cu por yega di pasa”, el a bisa.
Naturalmente el a bisa cu nan ta monitor e situacion. Pero e ta haya importante pa pueblo di Aruba por ta mas consciente di e situacion cu un horcan lo por yega eherce. Entre e recomendacion relevante el a cita entre otro pa check bo cas y rond di dje y tambe reenforsa bo dak.
Mas informacion tocante prevencion, Cruz Cora tin pensa di bin den prensa durante e luna aki. Di e forma aki Cruz Cora kier aporta pa suministra mas informacion na nos comunidad tocante con pa ta bon prepara durante e temporada di horcan aki.
Mirando experiencia di pasado, manera e efectonan di horcan Ivan riba nos isla, sra. Wanopa a bisa cu nan a siña hopi di e situacion aki cu a presenta 11 aña pasa. “Nos a siña hopi di dje. Nos a uza e parti ey hopi den añanan. Ya ta 11 aña pasa…”, el a bisa.
Ivan a laga un les atras
Despues di horcan Ivan, nan a construi un edificio cu ta Cruz Cora su cas di emergencia cu e tempo ey Aruba no tabatin. Tambe fei di e aña ey consecutivamente tur aña, nan ta prepara nan miembronan. Pero no solamente prepara nan, pero educa nan. “Nos a educa nos mes y ekipa cu material cu nos mester. Kiermen traha duro, busca material cu Cruz Cora tin actualmente den caso cu esey ta bira di pasa nos por pone un man y nos por yuda”, el a laga sa.
Un parti no tin di haber exclusivamente cu preparacion , pero nan tambe tin cu prepara fondo. Pa tal motibo e luna aki nan ta bay tin un recaudacion di fondo y e ta spera cu publico lo por duna un contribucion y acudi y di e forma aki nan ta yuda Cruz Cora. Dia 26 di juni venidero nan lo organisa un caminata den cuadro di ceramento di scol. Tur e actividad aki pa recauda fondo lo yuda na momento di un calamidad. Den nan actividad nan lo bin cu campaña di conscientisacion pa nos hobennan y nos adultonan riba kico lo para si algo lo pasa.
Nan tin plania di bin cu mas informacion den prensa mirando cu nan ta bayendo bastante reunionnan, entre otro cu otro organisacionnan cu tambe tin di haber directamente cu esaki y departamento di Gobierno pa asina nan por traha hunto.
