Den tres dia mas cu 400 persona a haya vacuna contra influenza

Despues di un retraso imprevisto y segun nan fuera di nan alcance, Directie Volksgezondheid (DVG) a cuminsa e siman aki aplicando e vacuna di influenza gratis na tur persona cu ta cay den e grupo di riesgo. Loke cu si DVG ta pidi ta pa tur persona den e grupo di risico trece carchi di AZV valido. Tambe e persona cu ta desea di ricibi e vacuna y cu no ta cay den e grupo di riesgo por pasa na departamento di Malesanan Contagioso (DBZ) mes pa haya e vacuna cu un costo adicional di 20 florin.

Vocero di DVG, Ichelle Simon y John Henriquez di DBZ a informa cu nan ta bin dunando e servicio di vacunacion contra influenza den diferente punto strategico, na unda pueblo lo por pasa pa asina ricibi nan vacuna. Sra. Simon a laga sa cu diabierna 15 di december nan a ricibi e ‘vacuna tan spera di influenza’. Di biaha nan a cuminsa cu e campaña di vacunacion aki pa nos comunidad.

Na momento cu e vacuna a yega, DVG a anuncia caba cu nan lo pasa diferente localidad strategico pa brinda e servicio aki. Dialuna nan tabata na MFA Noord. Diamars nan a bin cu e vacunacion aki na MFA-Paradera. Diaranson e hendenan a pasa na MFA Savaneta, y ayera nan tabata na Imsan San Nicolas. E personanan cu ta cay den e grupo di risico cu ainda no a haya e vacuna tambe nan lo por pasa na DBZ situa na Avicenastraat 1, den e siguiente orario 8.00am – 12.00pm y di 1.00 pa 3.00pm.

Sr. Henriquez a bisa cu e reaccion di e hendenan tabata positivo. Na MFA Noord alrededor di 80 persona a tuma vacuna. Na departamento di Malesanan Contagioso (DBZ) mas cu 100 persona. Kiermen den e prome dianan e ta calcula cu mas cu 400 persona a vacuna. Pero salubridad publico nan ta wordo haci yamada na e personanan di edad halto y e personanan cu ta cay den e grupo di risico pa curasha nan pa bin tuma e vacuna. E ta haya cu e ta hopi bon pa bo tuma e vacuna ya cu e ta yuda bo pa baha e risico ora cu bo ta bira malo. E ta reduci e sintomanan cu bo no ta bay haya un griep pisa.

Grupo di riesgo

Pa loke ta trata e gruponan di risico, esakinan ta personanan mayor di 60 aña, muchanan bou di 2 aña y personanan cu un enfermedad cronico. Aki ta referi na personanan p.e. diabetico, cu presion halto, problema cu higra, riñon y otro. E virus di influenza ta un virus respiratorio cu ta afecta e persona y te hasta por causa hospitalisacion. “Pa evita tur esey nan, haci uzo di e momentonan aki. E vacuna t’ey haci uzo di dje y evita cu bo ta haya complicacionnan na e momento cu bo ta bira malo pa bo no bay den hospital”, segun sr. Henriquez.