duana aruba logo Director di Departamento di Aduana Aruba (DAA),  Roderick Croes lo kier mira un cuerpo bon prepara y profesionalisa pa atende cu diferente reto. Asina e ehecutivo maximo di DAA a bisa den su mensahe cu el a dirigi na final di un Santo Sacrificio di Misa cu a tuma luga na Misa Cristo Rey na Brasil, ayera mainta.

Retonan
Den cuadro di Dia Internacional di Aduana, sr. Croes a declara cu nan ta realisa un trabou dificil riba tereno fiscal y no fiscal. Tambe el a anuncia cu e aña aki nan lo bin cu diferente estudio cu nan a cuminsa na 2016, pero cu nan lo mester bin cla cu nan pa  e aña aki. “2017 ta un aña cu lo ta yena cu hopi reto.” E ta premira cu e departamento aki lo confronta retonan, pero e ta sigur cu pa medio di un team di aduana profesional, nan lo por supera tur e retonan  ey.

E caminda pa modernisa departamento di Aduana  lo continua den diferente area; ya sea operacional y administrativo. El a manda un mensahe cla na gobierno probechando e presencia di minister di Financia interino, Richard Arends,  bisando cu pa logra e modernisacion aki nan mester di medionan. El a pidi minister Arends pa si e por convence minister Angel Bermudez cu e cuerpo aki mester di medionan pa modernisa y yega di traha hopi miho.

Capacitacion
Un proyecto importante cu nan kier bira realidad e aña aki ta relaciona net cu e tema di Dia Internacional di Aduana 2017. E  in di haber cu e capacitacion pa nan personal lo por analisa data pa un bon maneho di control na frontera. Personal di Duana ta bay cuminsa analisa tur data cu nan tin a base di nan trabou pa asina  nan por mehora nan trabou. “Tene esey den cabes. Analisa e data pa un bon maneho di control na frontera”, sr. Croes ta indica. E ta remarca cu Duana no ta simplemente un ofishi sino “cu mas bien e ta un forma di pensa, un forma di biba y un forma di ser”.  Director di DAA a indica cu nan ta un organisacion cu ta cambia continuamente den nan forma di pensa y traha, ya cu tin situacion nobo cu ta wordo presenta cu ta haci cu nan mester cambia nan strategia tambe.

P’esey a base di lesnan interno y den exterior nan por pone den practica e conocemento aki. Igualmente el a laga sa cu experiencia cu ta pasa di un duanero pa otro ta importante tambe pa nan  realisa  nan trabou manera debe ser. E mescla aki entre e conocemento y experiencia ta haci cu e cuerpo uniforma aki por realisa profesionalmente nan trabou; y aplicado e ley debidamente.

E ta destaca cu aña pasa nan a haya mas instrumento y training pa realisa nan trabou cu a  contribui pa haci miho nan trabou riba tereno fiscal. Tambe e training cu nan a yega di ricibi riba defensa personal y cargamento di arma a permiti pa nan por organisa miho nan seccion di Aduana na waf. E ta haya esaki masha importante mirando e desaroyo mundial. Sin menciona nomber, director di Aduana a indica cu no mester lubida nos bisiña cu ta birando un peliger pa nos. “Nos mester ta bon prepara.”

Logronan
Un logro cu e ta haya importante ta departamento di Aduana online page cu ta bayendo bon, y cu  a bira un innovacion compara cu otro departamentonan di gobierno. Sr. Croes ta laga sa cu aña pasa tabata uno masha fructifero pa e departamento aki; ya cu e tabata un aña di hopi logro cu gobierno mester sinti su mes orguyoso di e departamento aki pa e trabou cu nan a desplega. Pero no gobierno so, sino comunidad henter mester ta contento cu e departamento aki, pasobra danki na nan trabou “nos ta tene nos isla, nos dushi Aruba, liber di cosnan ilegal cu nos ta para nan”. E ta pidi su coleganan duanero pa nan ta orguyoso di nan mes; ya cu tur dia nan ta traha pa hisa nan nivel y brinda un servicio cumpliendo cu e demanda di nos comunidad. 2013 a bira un aña historico pa nan; ya cu a bin cu e independisacion of separacion di Duana cu a bira un departamento riba su mes for di departamento di Impuesto.

Sr. Croes ta reconoce cu for di e tempo ey duana ta un “tiki manca” pa motibo cu gran parti di e personal administrativo a keda den e departamento di Impuesto. Locual a exigi cu nan a cuminsa traha keto bay pa yega na e solucion di e problema aki, yenando e vacatura cu e cambio di status aki a trece cu ne. Tambe e uzo di sistema digital mas independisa a yuda pa nan  ta los for di e sistema administrativo di departamento di Impuesto.