Dept. di impuesto no ta na haltura si un empresa tin intencion di cera of no

No necesariamente departamento di impuesto mester ta esun cu mester bati e bel prome, ora cu companianan ta cera di un dia pa otro, lagando trahadonan desampara y sin pago di nan salario y sin paga otro compromisonan. Hasta lagando un debe grandi di belasting manera tabata e caso di Aura Casino y mas recientemente Señor Frogs.

Vocero di Servicio di Impuesto Aruba (SIA), Mervelyn Romano a declara na Bon Dia Aruba cu normalmente nan no ta na haltura si un empresa tin intencion di bay cera of no. Mayoria di bes e cliente doño di un empresa asina no ta bin  SIA pa informa cu nan ta bay cera nan empresa. “Si e ta bin informa nos, nos ta cuminsa cu e proceso kico tur tin pendiente y wak pa e por paga loke tur tin pendiente.” Mayoria di bes ta sosode ultimamente cu e empresa ta djis dal e porta cera. Si e empresario ta un persona di exterior e ta bula bay su pais; y e ta laga tur e debenan atras y “despues nos no tin manera pa cobra e debenan.”

Urgi trahadonan pa meld
Sra. Romano a indica cu den practica loke ta yuda hopi pa atende e tipo di situacion aki caminda empresario muy specialmente inversionista di afo,  bay lagando debenan y compromisonan atras ta, ora cu e trahadonan mes ta bin informa e departamento di impuesto cu tal empresa tin pensa di bay cera. Tambe nan ta haya tips di publico cu ta informa nan cu tin intencion cu den tal sitio nan ta haci negoshi y despues nan ta bay. E ta informa cu SIA ta conta cu un departamento cu ta esun di FIOT cu ta e team cu ta encarga pa investiga casonan asina pa nan por tuma accionnan rapido. “Si nos no ta haya niun tips y niun indicacion cu empresa ta bay cera, e empresa ta cera y nos no ta yega na tempo pa cobra loke cu nan mester paga ainda.”

E punto e ora ta keda sin contesta dicon departamento di impuesto ta laga acumula e debe di belasting di compania y no ta cobra mas efectivo sea lihe. Un otro punto ta cu ora inversionista sea doñonan stranhero di un compania na Aruba ta bay lagando debenan, nan ta keda mayoria biaha pa e doñonan local. Como cu mester un doño locual semper ora di lanta un compania. Sinembargo tambe un trust office por habri un compania aki y asina por mira cu e sistema no tur ora ta funciona.