Unabes cu wordo conoci e accidente di e deportista Colombiano di Crossfit, Andres Hernandez, durante un tour patras di Kapel di Alto Vista, a inicia un campaña di solidaridad pa recauda fondo y transporta e hoben aki pa Colombia, ya cu su estado di salud ta delicado.

Asociacion Amigos de Colombia (ASOCOL) tambe a uni na e campaña aki, caminda su Presidente Moises Fernandez a informa cu e hoben aki, conoci cariñosamente como ‘Kendo,’ finalmente a wordo transporta urgentemente den air ambulance pa Colombia diasabra anochi. Sinembargo un debe grandi a keda atras.

E mesun deportista, via su cuenta di Intagram @kendo.h22 a pidi ayudo, pa asina e por wordo transporta cu urgencia pa Colombia. Cu un cara tristo y un stem kibra, e deportista di 24 aña a bisa cu e ta interna den hospital di Aruba, ya cu el a sufri un accidente serio y su situacion ta delicado. “Mi mester biaha urgente pa Colombia. E vuelo tin un costo di 30mil dollar”, el a bisa. P’esey el a haci uzo di e red social aki y otro medionan di comunicacion local y internacional pa pidi colaboracion y ayudo na amigo, conocinan y di tur hende.

ASOCOL
Presidente di ASOCOL a bisa cu e fundacion aki semper a brinda su ayudo riba e parti social. E biaha aki tampoco ta un excepcion, cu e hoben Andres Hernandez kende a bin participa den un competencia di crossfit local. Pero lamentablemente el a sufri un accidente, ora cu e vehiculo (UTV) cu e tabata aden, hunto cu su coach, a bolter y a cay riba dje. Esaki a ocasiona cu el a haya lesion peligroso na su weso di lomba, cu a kibra hunto cu algun ribchi. E no tabata sinti su pianan.

E deportista tabatin un seguro cu a cubri parti di e gastonan, pero no tur. Entre otronan, a resta un debe di 6mil dollar pa transporta e deportista pa Cali. Moises Fernadez a bisa cu henter nos comunidad a reacciona positivamente pa yuda den e necesidad aki.

Ayera el a bay Misa Birgen di Fatima na Dakota, unda tur diadomingo pa 10or di mainta ta celebra un Santo Sacrificio di Misa na Spaño, y mayoria di hende a contribui cu e causa aki.

Nan a instala urna na diferente sitio, entre nan Don Jacinto Restaurant, Kikorico, Willy Pan, Panaderia Carina, Los Cafeteros, Fruteria Virgilio, y Fruteria Santo Domingo. Pero tambe Asociacion Amigos de Colombia tin un cuenta den RBC No.7700 0000 485 1062, caminda tur hende interesa por haci nan donacion y pone riba dje pa kico e ta. Otro parti di e recaudacion ta tumando luga via emisora Caliente, caminda su Director Juan Carlos Ventura, conoci como ‘La Sonri’, a inicia cu e campaña aki.

Nan ta spera cu lo por sigui colecta fondo te cu mañan traimerdia, ora cu nan lo reuni pa conta e placa recauda y canalisa e ayudo aki unda tin mester. Entre ayera y awe nan ta purba di yega of surpasa e suma di 6 mil dollar, cu tabata loke a falta pa cubri e gasto di transportacion den air ambulance. Pero ainda tin otro debe na hospital cu mester atende cune, ya cu pa dia tabata 2mil dollar. Igualmente nan mester mira ki sorto di gasto e seguro di e hoben deportista a cubri caba.

Nan lo divulga publicamente e resultado di e campaña aki. ASOCOL ta mantene contacto cu Will Erasmus, kende ta presidente di Fitville 2019 cu a organisa e competencia, unda e deportista Andres Hernandez a bin participa. ASOCOL kier ta bon informa di e ultimo desaroyo rond di e caso aki, y asina mantene nos comunidad bon informa tocante e situacion di e hoben Andres ‘Kendo’ Hernandez.