Miedo, preocupacion y factornan di stress constante den e poblacion durante e pandemia COVID-19 lo por tin consecuencianan pa largo plaso den e comunidad- y den famianan. Sinembargo, ta existi dos grupo cu ta rekeri atencion special durante e periodo di aislamento social: muchanan y hende grandi. Ambos mester tin un plan di accion y di cuidadonan pa preserva su salud fisico y mental.

E experiencianan cu e paisnan ta sufri cu e pandemia coronavirus ta brinda conocemento cu hende por probecha pa mehora e atencion di casonan. Por ehempel di hendenan grandi, cu ta particularmente mas vulnerabel pa e malesa COVID-19 debi na su fuentenan di informacion limita, sistema inmune mas debil y cifra di mortalidad mayor pa cu COVID-19.

Specialmente esunnan cu ta den aislamento y cu tin algun parti cognitivo deteriora of demencia, nan por bira mas ansioso, rabia, cu mas stress, agita, timido of hopi sospechoso durante e pandemia. Den e medidanan principal di apoyo, specialistanan ta recomenda pa brinda apoyo emocional a traves di rednan como famia y profesionalnan di salud mental, comparti datonan simpel riba loke ta sucediendo of ofrece un informacion precies riba con pa reduci e riesgo di infeccion cu palabranan cu nan por compronde.

Pa e hende grandi cu ta den casnan di cuido, director y personal mester garantisa cu ta existi medidanan di siguridad pa preveni e infeccion y preocupacionnan of panico excesivo (mesun situacion cu na hospitalnan). Di igual manera, mester brinda apoyo pa e personal di atencion cu tin cu keda cera of den cuarentena cu e residentenan y cu no por keda cu su famia.

Durante e cuarentena, mester ahusta e servicio di atencion den e casnan di cuido pa usa e tecnologia pa brinda capacitacion of asesoramiento pa e hende cu ta cuida di nan, tambe ta inclui capacitacion psicologico y prome auxilio pa e cuidadonan, esey ta hopi importante. E miho manera di tuma contacto cu hende grandi ta via telefon of mediante bishitanan regular (si e cas di cuido lo permiti).

Tambe ta conseha pa hende grandi cu experiencia y fortalesa pa nan por bira boluntario den e esfuersonan cu comunidad ta haci pa responde contra e coronavirus, nan por duna apoyo pa bisiñanan of pa cuida muchanan di e personal medico cu ta traha den hospitalnan y cu ta lucha contra e pandemia.

Di otro banda, un di cada cinco mucha cu a permanece den cuarentena of aislamento obligatorio na China a presenta sintomanan di depresion y ansiedad, di acuerdo cu un estudio realisa entre Universidad di Carolina del Sur y Huazhong, entre 2.330 menor di edad y muchanan pre-adolescente di e ciudad di Wuhan y Huangshi.

Esaki ta un investigacion academico cu a wordo publica pa Jama Pediatrics, un revista di divulgacion cientifico hopi importante y prestigioso na rond di mundo.

Den e rapport, e specialistanan ta recorda cu e pandemia actual provoca pa coronavirus a causa e ceramento di total di actividadnan y scolnan na 188 pais. Na China, 180 miyon di mucha a wordo afecta pa via di esaki. Durante un luna nan a presenta tur sorto di sintoma asocia cu depresion y ansiedad.

Scucha e muchanan y un tin actitud di comprension ta algo fundamental, “E muchanan por responde den un situacion dificil of di inkietud di diferente manera: sintiendo mas ansiedad, mas timido, rabia of agita, tambe si nan tin mal soño , nan por pishi riba cama of si nan tin cambio frecuente di humor. Den manera general, nan ta sinti miho si nan ta capaz di expresa y comunica nan sentimento of algo cu ta altera nan den un ambiente sigur y cu apoyo, cada mucha tin su manera di expresa nan emocion, tin biaha cu nan por hunga of pinta, esey por facilita e proceso”, specialistanan ta bisa.

E ser humano mester obedece durante un pandemia pa esunnan cu tin experticio y tambe mester confia di nan, evita di supone si no tin informacion of evidencia pa motibo cu esey ta genera hopi mas ansiedad y miedo, duna informacion di kico ta pasando hopi claro y di un manera ‘friendly’ pa e muchanan riba como reduci e riesgo di infeccion pa mantene nan mes na sigur den palabranan cu nan por compronde, asina como tambe evita specula riba rumornan of informacion no verifica.

Muchanan y hende grandi mester di un ambiente di amor y comprension, asina como tambe di un atencion mas dedica durante e momentonan mas dificil.

 

LEAVE A REPLY

Please enter your comment!
Please enter your name here