“E trabounan na Sero Cristal ta causa daño na naturalesa cu no ta reparabel, pero tambe e ta causa un peliger pa e salud di e residentenan local”, asina Fundacion Conserva Area Cristal ta laga sa den un relato cu Bon Dia Aruba a haya.
Desde algun siman e fundacion aki a wordo funda. E iniciativa a nace paso e fundacion su opinion ta cu solamente un organisacion integro por representa e interesnan di e ciudadanonan y di e naturaleza.
Desaroyo den e ultimo lunanan den e vecindario di Sero Cristal ta sumamente preocupante. Tin varios companianan ta kere cu nan a haya un ‘vrijbrief’ pa abusa di e terenonan banda di e sero. Ruimtelijk Ontwikkelingsplan (ROP) ta bisa bon cla cu esaki ta un reserva natural, na unda no por compromete niun edificio y otro actividadnan industrial.
E companianan no ta causa solamente daño na naturalesa so, pero tambe na e ciudadanonan manera; zonido duro, stof, cement, vibracion y trafico cu ekipo pisa. Nan no tin e permiso nan necesario y asina mes nan ta sigui cu e trabaonan, hasta pafo di e ‘perseelgrenzen’, e relato ta sigui bisa.
Desde dia 4 di juli 2017, casi tur departamentonan di gobierno di Aruba a wordo contacta tocante di e consecuencianan di e menasa pa e area aki y pa su ciudadanonan, pero ta un par di e departamentonan so a responde. E tendencia en general ta pa ‘schuif af’ nan responsabilidad.
Segun e relato di Fundacion Conserva Area Cristal, Salud Publico no ta wak e problema encuanto e procesamento di cement den aire liber. Asunto Economico no ta verifica e trabou real y apitud di e ubicacion. DOW no ta wak niun edificio y vivienda eleva. DIP no tin conocemento di e instalacionnan riba e terenonan dominio. Juridische Zaken a constata cu no a emiti ‘hindervergunningen’, pero no ta haci nada. Directie Natuur en Milieu a traha un rapport cu no ta publico y a ‘disparce’.
E ‘Mijnverordering’ cu ta basta bieu, no ta wordo modernisa pa evita erosion na e ultimo partinan berde cu tin na Aruba. Directie Arbeid y DPL no ta controla e condicionnan laboral di e empleadonan y no ta tene cuenta cu siguridad den vecindario.
E conseho literal cu nan ta duna ta: puntra polis pa pasa cu boso cerca e companianan aki pa wak kico ta bay robes. “Tur e ambtenaar nan aki ta haya un salario di Land Aruba y mester haci nan trabou como debe ser pa e ciudadanonan di Aruba. Pero nan no sa nan responsabilidad of nan no ta wordo controla den forma corecto”, segun Fundacion Conserva Area Cristal.
“Si dentro di 14 dia e departamentonan no ta bay controla na un forma adecua den e area Cristal y no cumpli estrictamente cu e legislacion vigente, nos como Fundacion Conserva Area Cristal ta obliga pa demanda e gobierno di Aruba debi na posibel accion ilegal den relacion cu e residentenan di e area na Sero Cristal.”
