Poco despues cu Horacio Oduber Hospital (HOH) a implementa sistema HiX, proveedor Hulandes ChipSoft a bira victima di un atake cibernetico. Director di HOH, Jacco Vroegop, a declara cu Aruba no a ser afecta. Sinembargo, despues di e declaracion no a sigui mas informacion publico tocante funcionamento di HiX na Aruba, mientras cu na Hulanda a confirma cu informacion personal y medico di algun pashent a ser horta.

ChipSoft a bira victima di un atake cibernetico dia 7 di april 2026. Como medida preventivo, conexionnan cu varios servicio, entre otro Zorgportaal, Zorgplatform y HiX Mobile, a ser desconecta. Z-CERT, e centro Hulandes specialisa den seguridad cibernetico den sector di cuido, a confirma e incidente y a sigui publica actualisacionnan tocante investigacion.

E atake a bin poco tempo despues cu HOH a cuminsa traha cu HiX como su sistema electronico nobo. HiX ta ser uza pa procesa y administra informacion di pashent, entre otro den hospitalnan na Hulanda.

Un dia despues di e atake, Vroegop a declara na un medio di comunicacion cu HOH na Aruba no a ser afecta. Segun e splicacion na e momento ey, e sistema di hospital ta ser host localmente, via Setar, y no tabata directamente conecta cu ChipSoft via un conexion externo. Consecuentemente, impacto na Aruba lo tabata minimo.

E declaracion a duna impresion cu situacion na Aruba tabata bao di control. Pero despues di esaki no a sigui un actualisacion publico mas detaya tocante funcionamento di e aplicacion, ni si pashentnan a experimenta limitacion den acceso na nan informacion.

Mientras tanto, na Hulanda investigacion a sigui.

Dia 17 di april Z-CERT a anuncia cu investigacion forensico a confirma cu criminalnan a logra horta datonan personal, incluyendo informacion medico di pashent, cerca algun cliente Hulandes di ChipSoft. Na mesun momento, Z-CERT a indica cu organisacionnan cu ta draai software di ChipSoft den nan propio ambiente of via otro proveedor di hosting no tabata afecta den e mesun manera.

Esaki ta un distincion importante, pasobra ta cuadra cu e splicacion cu HOH a duna. No tin indicacion publico te awor cu informacion medico di pashentnan di HOH a ser horta durante e atake.

Informacion di pashent ta dato altamente sensitivo, pasobra e por inclui diagnostico, resultado di investigacion y otro informacion personal y medico. P’esey, aplicacionnan manera HiX mester conta cu medidanan fuerte di seguridad pa proteha privacidad di pashent y preveni acceso no autorisa of robo di dato. Ademas, medidanan tuma durante un incidente cibernetico por tin consecuencia pa acceso di pashent na e sistemanan.

Esaki tabata e caso na Hulanda, caminda e incidente tabatin consecuencia pa acceso na sistemanan di pashent, incluso cerca organisacionnan cu a tuma medida preventivo.

Por ehempel, BovenIJ Hospital a desconecta su portal di pashent y HiX Patient App dia 7 di april. Te dia 29 di april e hospital a anuncia cu ambos por a ser uza atrobe. Otro organisacionnan di cuido a tuma medida similar mientras investigacion y control di seguridad tabata tumando lugar.

Na Aruba, despues di e declaracion di director di HOH, no a sigui informacion publico si e aplicacion a sigui funciona normal of si algun parti di e servicio a ser desconecta.

Recientemente un pashent a acerca Bon Dia Aruba cu su experiencia cu e sistema na Aruba. Segun e pashent, anteriormente e por a drenta e aplicacion pa haya su informacion medico, comunicacion y cartanan di dokter via e aplicacion, pero despues e no tabatin acceso mas na e aplicacion ni su informacion manera anteriormente.

Mas recientemente, segun e pashent, el a ricibi un carta di dokter via Zivver, un otro plataforma cu ta ser uza pa manda informacion sensitivo y documento di forma proteha.

E experiencia di un solo pashent no ta conclui cu tabatin un problema general cu HiX na Aruba, ni cu e ta consecuencia di e atake cibernetico contra ChipSoft. Pero e experiencia si ta pone funcionamento actual di e aplicacion na Aruba atrobe bao di atencion, particularmente pasobra despues di declaracion inicial di HOH no a sigui mas informacion publico tocante esaki.

Bon Dia Aruba a acerca Departamento di Comunicacion di HOH pa haya claridad. Entre e preguntanan manda ta si HOH por confirma si e app tambe a bira victima di hacking, si actualmente e ta funcionando optimal y, si no ta asina, kico ta situacion actual di e aplicacion.

Te na momento di publicacion, Bon Dia Aruba ainda no a ricibi contesta.