Despues di casi 2 aña ainda no a introduci ‘Ley di Codigo Civil’ nobo

 Codigo Civil di Aruba ta conoce cambio cada pasa mas o menos 15 aña y dia 8 di september 2016, parlamento di Aruba a vota na fabor di Codigo Civil nobo, na unda cu un total di 800 cambio lo tuma luga. Sinembargo despues di casi 2 aña, ainda gobierno no a manda e asina yama invoeringsverordening pa parlamento pa por finalisa e trayecto y pa e cambionan drenta na vigor.

Bon Dia Aruba a y ta haciendo preguntanan riba e asunto aki tanto cerca miembronan di parlamento como tambe na gobierno di Aruba. Di locual cu por a conclui te cu na e momento aki ta cu e famoso ‘amienda 7’ ta un di e factornan cu tin e introduccion tranca. Comentario cu Bon Dia Aruba a ricibi di entre otro parlamentario Hendrik Tevreden (MEP) ta cu segun e por a bin compronde, Directie Wetgeving lo a posiblemente haci un adaptacion na e amienda aki cu parlamento a aproba, pero lo mester warda pa ora yega parlamento pa por confirma si di berdad ta asina.

Parlamentario Marlon Sneek (AVP)  tambe a confirma na Bon Dia Aruba cu te na e momento aki nan no a ricibi nada di gobierno pa loke ta trata e ley di Codigo Civil. E ta splica cu como e no ta algo cu ta bin di iniciativa di parlamento, no ta usual cu ta manda pidi gobierno informacion di e status di e ley. Pues na e momento aki, parlamento ta keda en espera di gobierno.

Bon Dia Aruba a haci diferente pregunta na minister Andin Bikker (POR) y ta pendiente su contesta. Na mes momento ta en espera di un reunion cu prome minister Evelyn Wever-Croes (MEP) pa haya informacion global di kico e cambionan di e ley lo nifica pa gobierno y tambe pais Aruba.

Amienda 7
E amienda number 7 cu a keda presenta durante tratamento di e Codigo Civil, ta trata di union civil. Esaki pues ta habri espacio pa entre otro parehanan di mesun sexo por registra nan union, treciendo cu ne cu nan ta haya e mesun derechonan legal cu un pareha casa, manera entre otro pensioen.

E amienda aki a trece hopi discusion den comunidad. Originalmente tabata papia di matrimonio di parehanan di mesun sexo pero despues a converti esaki pa union civil. Tabata tin hopi discusion entre partidonan grandi y nan simpatisantenan, cual a hasta causa cu algun parlamentario a retira nan sosten despues di a vota na fabor di e amienda. Por corda tambe con gruponan di sosten di e grupo LGBT a vociferanan, splicando cu unico cos cu nan kier ta un trato igual. Iglesianan di diferente creencia tambe a duna nan banda di medaya segun nan creencia.

You May Also Like

DSC_0900.JPG

Cas casi kima ora fusebox di Elmar a muha y causa kortsluiting

Diasabra den careda di 9 or mainta habitante di Palisiaweg a constata cu e fusebox ...

Accion di firma contra Stichting Publieke Onderwijs

SEPPA a organisa un otro reunion informativo pa minister di Enseñansa por a haci ...

director Arikok Emil ter Horst

Directiva y director Parke Arikok 2 biaha dilanti hues dialuna

Directiva di Parke Arikok a haya nan mes den confrontacion atrobe cu e director ...

Personal di hotel Occidental

‘Occidental hotel no ta paga’

Occidental Hotel a wordo cumpra pa e cadena di hotel Barcelo. Pero siman pasa ...

AAA ta aclara proceso pa operador nobo

Actualmente Aruba Airport Authority N.V. (AAA) ta den proceso pa busca un operador pa ...