Un operacion internacional atravesando frontera, involucrando autoridadnan di Croacia, Italia, Motnenegro, Hulanda, Portugal, Serbia, Slovenia y Spaña, cu sosten di Europol, a conduci na e desmantelacion di un organisacion criminal cu tabata trafica cocaina for di Sur America na Union Europeo y otro paisnan.

E investigacion riba e red criminal aki a dura varios aña y a involucra un cantidad di Estadonan Miembro di Union Europeo y paisnan tercero di region Balkan occidental. E red di traficacion di droga tabata componi principalmente di ciudadanonan di Montenegro, pero tabata involucra tambe ciudadanonan di Bosnia y Herzegovina, Croacia, Italia y Serbia, segun un comunicado di Europol.

Entre 2019 y 2020, autoridadnan di cumplimento di ley a confisca mas di seis ton di cocaina na Aruba, Cote d’Ivore, Portugal y Spaña.

Aruba

Segun un relato di Organized Crime and Corruption Reporting Project (OCCRP), publica 27 di februari 2020, varios ciudadano di Montenegro a keda deteni na momento cu autoridadnan di Aruba a intercepta un boto transportando tonelada di cocaina destina pa Grecia, segun directorado di polis di Montengro a bisa OCCRP.

E barco, yama Aressa y nabegando bao bandera di Cameroon, a keda intercepta cerca di costa Venezolano, y tabata transportando alrededor di cinco ton di cocaina, cu balor riba caya di 160 miyon euro, gobierno di Montenegro a anuncia riba Twitter. A bisa cu e accion den e awanan di Caribe tabata resultado di varios luna di actividad conhunto entre agencianan di ley Hulandes, Britanico, Serbio y Montenegrino.

Segun e medio online BalkanInsight, polis a bisa cu “e Montenegrinonan aresta tabata miembronan di tripulacion. Ta sospecha cu e barco transportando e cocaina tabata bay trafica esaki na un waf na Europa occidental.” E tripulacion a keda deteni pa traficacion di droga. BalkanInsight a reporta cu e barco Aressa a sali for di Surinam na inicio di februari, a para na Guaranao na Venezuela, y tabata bayendo pa Thessaloniki na Grecia. Segun medionan di comunicacion internacional, esaki tabata e confiscacion di droga mas grandi den historia di Aruba.

Ademas, segun e portal online CrimeSite, publica dia 29 di november 2019, Wardacosta di Region Caribense a confisca 1,5 kilo di cocaina. Segun wardacosta, esaki a sucede despues cu a detecta un barco sospechoso riba radar, den awanan teritorial di Aruba.
Durante control, a resulta cu e barco ta un go-fast. E cuatro miembro di tripulacion abordo tabatin mas cu 1.5 ton di cocaina abordo. A entrega e tripulacion y e droga na Aruba pa continua cu e investigacion. Esaki tabata e segundo accion di confiscacion di cocaina cerca di costa di Aruba e aña en cuesion.

CrimeSite ademas a reporta dia 20 di januari 2021 cu a exigi un sentencia di 15 aña contra e capitan di e barco captura na februari 2020 cu cinco ton di cocaina abordo, Aressa. Contra e otro personanan abordo a exigi 12 aña.

Autoridadnan Hulandes tabata alerta pasobra a ricibi informacion tocante e carga for di polis di Colombia. Según fiscal den e caso, un di e sospechosonan diripiente a cuminsa duna declaracion durante detencion preventivo, incluso tocante e otro acusadonan.

Abogado di e capitan di e barco, Cem Polat, a duda cu e sospechoso a cuminsa papia espontaneamente. Segun Polat, “Den mi opinion a haci acuerdo cu e sospechoso ey, por ehemplo, ofreciendo proteccion na su famia si e duna un declaracion incriminatorio. Incluso mi ta pensa cu a usa e homber como un infiltrado civil criminal.”

Durante e audiencia, a bin na cla cu Ministerio Publico a lubida di incorpora informenan oficial na e dossier di combersacion anterior cu e sospechoso. Polat a argumenta cu mester a declara e fiscal como improcedente. Den e dossier no a keda conoci ken tabata e clientenan di e transporte di cocaina.

Mafia ‘Ndrangheta

E investigacionnan despues di e confiscacion na Portugal a destapa posible vinculo entre e red criminal aki y e organisacion estilo-mafia, ‘Ndrangheta. E mesun confiscacion aki a conduci na identificacion di 17 sospechoso nobo, 13 di ken tabata ciudadano di Montenegro. Durante e investigacion, a enhuicia 29 sospechoso na Croacia, Italia, Montenegro, Hulanda, Serbia, Slovenia y Portugal.

Riba e dia di e accion, 27 di juli ultimo, oficialnan na Europa a tene accion na 37 lugar (1 na Croacia, 2 na Italia, 33 na Montenegro y 1 na Serbia, a aresta 12 sospechoso (1 na Croacia, 1 na Italia, 8 na Montenegro y 2 na Serbia) y a confisca holoshi caro, carchi di banco, documento, municion y arma, un vehiculo, un speedboat y cash.

Segun Organisacion Internacional di Polis Criminal, Interpol, ‘Ndrangheta ta un di e organisacionnan criminal mas poderoso y extensivo na mundo. Originando den region Italiano di Calabria, e organisacion a expande rond mundo y ta continua crece na un velocidad stabiel. Awendia, ‘Ndrangheta ta considera e unico organisacion mafia Italiano cu presencia na tur continente na mundo.

E aumento di crimen estilo-mafia ta representa, segun Interpol, un menasa unico y urgente, ya cu lasonan familiar fuerte y practicanan politico y comercial corupto ta permitie pa penetra tur area di bida economico.
Impulsa pa poder y influencia, e ‘Ndrangheta ta involucra den un rango amplio di actividad criminal, di traficacion di droga y labamento di placa te extorsion y manipulacion di contractnan publico. E ganashinan ilegal enorme aki ta wordo reinverti den companianan regular, reforsando mas ainda e control di e organisacion y contaminando e economia legal.

 

LEAVE A REPLY

Please enter your comment!
Please enter your name here