(AP) — Despues di varios siman di anticipacion, lesadonan a haya oportunidad di evalua e autobiografia nobo di Prins Harry ora cu e buki a drenta tiendanan dia 10 di januari.
E empresa editorial a bisa cu ‘Spare’ a bende 400 mil copia den Reino Uni den tur formato – hardback, e-book y audio – riba su prome dia. Segun e director di Transworld Penguin Random House, e unico buki cu a bende mas den su prome dia ta esunnan cu ta envolve e otro Harry (Potter).
Varios tienda na Reino Uni a habri nan porta den marduga pa bende copia pa fanaticonan leal di e famia real y otro personanan curioso. Basta persona a bisa cu nan mes kier a forma un opinion di e buki despues cu algun detaye a wordo treci na claridad den noticia.
E multitud di revelacion y acusacion cu e buki ta conta ya a aparece den media. Den e autobiografia di e prins, 38 aña di edad, ta conta di su luto cu e morto di su mama, Prinses Diana, su disputanan cu su ruman Prins William y su frustracion cu su rol como e ‘reserva’ real.
E a critica e prensa Britanico pa nan cobertura di informacion lascivo, intruso y tin biaha completamente falso. Tambe e ta reclama cu su famia tabata inhospitalario cu su esposa Meghan y ta acusa cierto miembro di famia, incluyendo su madrastra Camilla, di revela storianan na e prensa pa daña reputacion di Prins Harry y su esposa.
Palacio Buckingham ainda no a duna comentario tocante e acusacionnan, pero aliadonan anonimo di e famia real ta den desacuerdo.
Harry su revelacion di e tension cu ta reina den e cas di Windsor – cu detayenan di su lucha cu su salud mental, experiencia cu relacionnan sexual y droga y un carera militar di dies aña – a genera hopi cobertura den prensa.
Te awo e buki ta esun di mas cumpra riba e website di Amazon U.K.
Segun John Cotterill, cumprado di buki no ficcion na tiendanan di Waterstones, a conta e revista The Bookseller cu ‘Spare’ ta un di e bukinan mas pidi den e ultimo decada pa Waterstones.
Es mas, entrevista cu e Prins cu e locutor ITV tocante e buki a trece 4.1 miyon di televidente diadomingo.
