Destino politico di Paul Croes ainda ta un pregunta

paul croes.jpg

paul croes.jpgDesde diabierna ultimo a cuminsa un avalancha di rumor riba e actual minister sin cartera Paul Croes. E comentarionan a cuminsa desde oranan trempan di atardi, dunando di conoce cu sr. Croes no lo ta bon bini na e evento organisa pa partido AVP riba vondellaan. E rumornan a bira mas hopi ora cu a nota cu sr. Croes en berdad no a haci acto di presencia na e evento.

Den un declaracion pa e website di noticia 24ora, Minister President Mike Eman ta duna di conoce cu ta sr. Croes lo a tuma e decision pa no ta presente na e evento, pa asina no crea e confiansa den su sostenedonan cu e lo ta riba lista pa eleccion 2017. Sr. Eman a splica cu ainda no a tuma e decision si sr. Croes lo bolbe bek riba lista di AVP. E situacion aki ta bin pa motibo di un investigacion cu a cuminsa 4 luna atras y a hala hopi atencion, na unda ta sospecha sr. Croes di entre otro soborno y corupcion.

Reemplaso
Mientras tanto cu tur cos ta indica cu e siman aki ainda sr. Croes lo ta entregando su retiro completo for di e gobernacion actual, di biaha por a comprende di varios fuente cu lo ta buscando un reemplaso pa e minister y cu esaki lo ta den su famia mes. Segun un reportahe di NoticiaCla, lo ta trata di e ruman muhe grandi di e mandatario, esta e locutora conoci Erin Croes. Sra. Croes a duna un reaccion na e website di noticia cu en berdad e la wordo acerca pa reemplasa su ruman pero hopi informacion e no por a duna.

Locual no ta conoci ta si e reemplaso aki lo ta per direct, esta como minister of si lo ta pa bay riba lista di eleccion cu mester tuma luga dia 22 di september binidero. Den pasado esaki a yega di tuma luga caba cu Glenbert Croes kende tambe a wordo reemplasa pa un termino cortico door di su ruman. E retiro y reemplaso aki ta pa duna espacio pa e investigacion penal por cana sin problema, segun un fuente di partido AVP ta bisa nos redaccion.

Rumornan fuerte
E prome rumornan persistente cu a circula den weekend tabata cu supuestamente e ruman di nos prome minister y ex mandatario Henny Eman, lo tabata esun cu a duna ordo pa sr. Croes no tey presente na e evento. Nos redaccion a purba di confirma esaki pero no a logra te na momento di redacta e articulo aki.

Tambe tabata tin un mensahe di bos circulando caminda suegra di e mandatario ta splica su mal contento cu e partido y cu e ta sinti cu AVP a laga Paul Croes y henter famia na caya. Den e mensahe di bos por a scucha e tristesa cu nan ta pasando aden ya cu dado momento por a nota e cambio den e stem cu a bay di uno rabia pa uno di yoramento. Notabel den e mensahe tambe tabata cu a wordo expresa cu tur 28 otro candidato, inclusivo e lider a laga sr. Croes na caya.

“Un scop pa danki”, tabata reaccion di un di e sostenedonan di sr. Croes pa nos matutino. Durante e siman aki nos lo ta buscando mas informacion pa wak con e situacion aki ta sigui desaroya su mes.

You May Also Like

Militarnan lo duna asistencia pa vigila costa di Aruba y Corsou

Entrante otro siman militaran di Aruba y Corsou lo cuminsa duna asistencia na patruyanan ...

Tur cos ta cla pa Roadmach & Calypso 2018 na Carnival Village

Lot a wordo tira pa e festival di Calypso & Roadmarch cu ta bai ...

OM: 300 Kilo di Cocaina confisca na Barcadera

Bao guia di Ministerio Publico di Aruba, e Unidad di Criminalidad Organiza di Cuerpo ...

Prijs di gasolin ta subi na Aruba entrante diaranson

Basa riba e posting promedio di Platts US Market scan (Gulf Coast) pa e ...