Diadomingo AVP a presenta Eduard Salomon “Edu” Vos como candidadto nobo riba lista. Eduard Salomon “Edu” Vos ta subrino di e defunto Watty Vos.
Sr. Vos a splica con na un edad di 16 aña cu el a cuminsa traha na un oficina di abogado di su defunto omo y a haya un pasion pa politica. Sr. Vos a tarda pa tuma un decision pa drenta e arena politico, pasobra “mi a wordo inculca pa tanto mi tata y mi omo Watty cu politica no ta wega. Politica ta algo serio pa motibo cu politica ta e vehiculo pa por yega na prosperidad, bienestar y siguridad di un comunidad. Pa logra esakinan mi ta di opinion cu mester tin comunicacion debido, consistencia y control di maneho pa asina por yega na calidad di gobernacion y crea asina mas confiansa ainda di e comunidad.”
E prome stap di Edu Vos den politica no ta e momento cu el a anuncia su decision diadomingo atardi, sino di 1983, tempo cu e tabatin 9 aña, canando den Rancho, Socotorro, Madiki, Bushiri y Compananshi, partiendo invitacion pa reunionnan publico of e corant di AVP REALIDAD.
