Memey di acusacionnan di ‘racismo’ y ‘cultura di trabou toxico’ tras di escena di e team di e programa di Ellen DeGeneres, a surgi un testimonio cu a confirma locual ex-empleadonan di e show a bisa, cu ta revela e peticionnan cu a adopta pa e conductor: “No papia cune, no bay cerca dje, no mir’e.”

Neil Breen, ehecutivo di e programa Today di Australia, na 2013, ken awo tin su propio espacio, a declara cu e nunca por a interactua cu e presentadora di 62 aña, a pesar cu e tabata realisa un gira di trabou na e pais en cuestion shete aña pasa.

Breen a declara na 4BC, e stacion di radio pa cual awo e ta colabora, cu inicialmente DeGeneres tabata co-presentador di Today, pero su ekipo di produccion – cu kende si e tabatin contacto durante e biahe – a cambia e plannan constantemente.

El a agrega cu finalmente el a corda di un entrevista cu periodista di entretenimento, Richard Wilkins, loke a nifica cu pa concreta e encuentro, su team lo traslada di Sydney na un di e hotelnan luhoso di Melbourne, unda el a ricibi peticionnan straño y indicacionnan di parti di e personanan cercano na e comediante.

“E productor a hala nos un banda y a bisa, ‘Awo, Neil, niun hende mester papia cu Ellen. No papia cune, no bay cerca dje, no mir’e’” e Australiano a recorda. “E ta bay sinta, papia cu Richard y despues e lo bay”, e persona encarga di compaña Ellen a agrega.

Despues di tende e peticionnan aki, Bren tabatin varios pregunta, expresando, “Mi a bisa, ‘bo ta hopi estupido? Mi no por mir’e?’ Henter e cuenta a parce mi hopi straño.”

Bren a destaca cu e ta desconoce si e peticionnan aki tabata haci pa Ellen mes, pasobra e no a logra papia cune, pero si el a afirma cu e team cu tabata compañ’e a encarga di scoge tur cos su alrededor, manera asiento, iluminacion y hasta e forma con a conduci e entrevista. “Mi no tin idea si e ta un bon persona of no, mi no tin idea. Pero mi por bisa bo cu e personanan cu ta traha cune tabata cana riba un teritorio fragil henter e tempo”, el a agrega tocante loke el a biba banda di e team di e programa conduci pa Ellen DeGeneres desde 2003.

Neil Breen tambe a menciona cu ademas nan tabatin problema durante e entrevista, cual tabata interumpi pa harimento di e team di DeGeneres.

E testimonio aki a surgi despues cu Telepictures y Warner Bros. Television a anuncia un investigacion interno, pasobra varios empleado y ex-empleado a denuncia cu fuera di bista, nan a soporta un ‘ambiente toxico di trabou’.

Un fuente cercano na e produccion a confirma na Variety cu DeGeneres, conoci pasobra e ta busca di ‘ta amabel cu otronan’, no ta e foco di e investigacion pa compania Warner Media, maske su ex-empleadonan ta kere cu e mester enfrenta scrutinio.

E scandal a cuminsa na momento cu BuzzFeed a duna un voz na ex-empleadonan di DeGeneres, kende a acusa e team di racismo y un cultura toxico. Den e articulo, a destaca un dinamica di ‘miedo’ den cual e empleadonan tabata haya represalia pa tuma dia liber pa problemanan medico of di famia, entre otro. Nan a culpa e alto directivonan di e programa pa permiti e comportamento aki, di intimidacion.

Ademas, na april a sali na luz cu mayor parti di e team di Ellen a rabia pasobra e filmacion di e produccion a muda na cas di e strea, cu ayudo di un empresa externo yama Key Code Media, mirando e pandemia, y a recorta nan salario cu 40%.

No tabata prome biaha cu ex-empleado ta keha di trato laboral den e programa di DeGeneres, ken a pesar di su carisma y popularidad, tambe a ricibi keho di algun di su invitadonan pa trato friu y descortes cu a ricibi di su parti.