Ministerio Publico a informa awe cu hues comisario a haci ordo pa alarga detencion di tramitador di Paul Croes pa 60 dia mas. Mas informacion of desaroyo riba e caso/investigacion aki ainda no ta conoci.
E señora inicial N. a keda deteni algun siman pasa riba cinco di september. E tramitador aki ta wordo sospecha di a soborna (koop om) e sospechoso principal (Paul Croes) cu placa y regalo segun informacion di Ministerio Publico. E sospechoso aki a pasa e prome fase, cual ta e ‘inverzekeringstelling’. Esaki ta encera cu autoridadnan ta haci un peticion pa alarga detencion di sospechoso si esaki ta necesario. Despues a pasa pa e fase di keda 16 dia den ‘bewaring en verlenging bewaring’, cual ta encera extencion pa interogacion.
Paul Croes y chauffeur
Den un relato di Ministerio Publico a keda anuncia algun dia atras tambe cu hues comisario a prolonga detencion di Paul Croes y su chauffeur Roque Aparicio cu 60 dia mas.
E detencion, cual ta relaciona cu e caso IBIS, a wordo pidi pa fiscal di husticia. Hues comisario di Corte a dicidi di honra e peticion ya cu e hues comisario tambe ta di opinion cu tin sospecho fuerte cu Paul Croes a haci su mes culpabel pa hechonan castigabel serio.
E hechonan aki ta inclui, segun e relato: soborno di oficial publico (pasivo), labamento di placa, apropiacion intencional, falsificacion di documento y traficacion humano.
Pa loke ta e chauffeur, tin e sospecho fuerte cu el a haci su mes culpabel hunto cu Croes di soborno pasivo y labamento di placa. Ambos sospechoso a wordo hiba bek pa KIA. Nan no mag di tin contacto cu ningun hende, menos nan abogado.
E investigacion lo sigui, segun vocero di Ministerio Publico. E ekipo investigativo lo scucha mas testigo y sospechoso den e simannan venidero. Un prome tratamento (pro forma) den e investigacion lo tuma lugar den inicio di december 2017, segun expectativa di OM.
“Cada fin di periodo, hues comisario ta check detencion di un persona y ta dicidi si e tin cu sigui of no. Detencion ta un medida hopi pisa riba un ser humano, y si e no ta absolutamente necesario, no ta haci uso di dje,” Ann Angela vocero di Ministerio Publico a splica Bon Dia Aruba.
