Di 30 edicion di Festival di Buki pa Mucha “Biba Natura-Lesa” ta tuma luga na november

Cu e presentacion di e buki, ‘Jair y e buriconan’ y ‘Gosa den naturalesa’ ta e titulonan di e buki cu Biblioteca Nacional Aruba ta presenta na muchanan di Aruba pe e aña aki, pa asina ey stimula nan lesa buki den naturalesa y siña di e bestianan di Aruba.

Nan a indica cu e buki ta contene 2 storia y ta p’esey tin 2 titulo, esaki ta un edicion special pa e di 30 edicion di Festival di Buki pa Mucha unda cu di mesun forma nan ta señala cu orguyo biblioteca ta publica e buki pa mucha cu a wordo skirbi pa James Ocalia (Aruba) y ilustra pa Wouter Goudswaard (Hulanda) ‘Jair y e buriconan’. E otro banda di e buki cu ta ‘Gosa den naturalesa’ a wordo skirbi pa Evelien van Dort y ilustra pa Paul Wong (Aruba).

Apertura di e festival ta dia 4 di november na Cas di Cultura y e festival mes ta cuminsa dia 7 di november te dia 11 di november na Biblioteca Nacional di Aruba.

E buki aki ta un regalo pa e muchanan di Aruba, cu manera tur aña e ta den 2 idioma, Papiamento y Hulandes. Desde apertura oficial di e Festival di Buki pa Mucha 2022 por haya e buki gratuitamente na tur libreria ora cumpra un buki pa mucha, tanten cu tin na stock.

Traduccion ta di Lilian Semeleer y redaccion ta haci pa Sophiene Maduro-Verhaegh, Lilian Semeleer y editor Jeroen Hoogerwerf di cas editorial Levendig, e buki a keda publica pa Levendig Uitgever na 2022. ISBN 978 90 83222 233

Tema di e Festival di Buki pa Mucha 2022 ta ‘Biba Natura-Lesa’ y e autornan di e buki pa mucha aki a laga e tema guia nan den skirbimento di nan storia. Despues cu James Ocalia y Evelien van Dort a skirbi nan storia nan a entrega esaki na dos ilustrador, Wouter Goudswaard y Paul Wong. Wouter y Paul a laga e storia inspira nan, pa nan por a ilustra esaki. Asina e storianan a keda completa cu ilustracion masha bunita. ‘Jair y e buriconan’ ta un stripverhaal colorido unda e caracter principal, Jair, ta stimula mucha pa planta mata y fruta y tambe pa cuida bestia. E di dos parti di e buki ta di e autor Evelien van Dort y ta contene 10 storia cortico, tur tin di haber cu amor pa naturalesa.