(AFP) – Volcan Cotopaxi, e di dos mas halto na Ecuador, ayera diamars a manece cu un columna di shinishi, aunke Instituto Geofisico a splica cu esey ta parti di un proceso di erupcion di intensidad abao.
Segun Benjamin Bernard, experto di e institucion aki a bisa cu e actividad sismico no ta evidencia carga importante di lava den su interior for di dia di su reactivacion na luna di october ultimo.
Den e caso di Cotopaxi, ta existi “volumen di erupcion hopi chikito, p’esey mi no ta kere cu ta bay permiti un desplasamento di energia di e volcan, pero esey ta sirbi pa corda nos cu ta un volcan activo y cu protocolnan mester ta actualisa, igualmente ruta di evacuacion y otro procedura necesario”, el a bisa.
E organismo a señala cu e columna a registra un haltura aproxima di 700 meter y debi na bientonan el a dirigi direccion west, e nivel di erupcion den dianan aki te awor ta menor na esun registra entre augustus y december di 2015.
El a agrega cu analisisnan ta demostra existencia di un curpa di lava relativamente sin gas cu por ubica den zonanan poco profundo bao e cumbre di e Cotopaxi, di 5.897 meter y cu no tin evidencia precies di un carga di material di lava profundo.
E volcan ta funciona como un sistema habri for di e profundidad “den cual emision di shinishi chikito por cuminsa di manera inespera sin señalnan”.
Autoridadnan di Ministerio di Ambiente a prohibi entrada di turistanan na e Parke Nacional Cotopaxi, ubica na 72 kilometer na sur di Quito.
E ultimo erupcion di e volcan aki a wordo registra na 1877. Den e pais aki tambe ta den actividad di erupcion casi permanente e volcannan Sangay y Reventador, cu ta presenta actividadnan diario di hasta cinco biaha.
