Di ocho edicion di Cupcake di Speransa dedica na Aljereau Tromp

Diamars ultimo a tuma luga un conferencia na unda a anuncia e di ocho edicion di Cupcake di Speransa organisa pa GLW Foundation. George Winterdaal, presidente di GLW Foundation, a splica cu e aña aki Cupcake di Speransa ta dedica pa yuda e hoben Aljereau Tromp di ocho aña edad pa asina e por ricibi e ayudo medico necesario den exterior.

Cupcake di Speransa, Winterdaal a indica, a cuminsa ocho aña pasa cu e benta di apenas 100 cupcake riba caminda y durante añanan esaki a crece danki na comunidad di Aruba. Pa aña 2023 e edicion di Cupcake di Speransa lo tuma luga dia 13 y 14 di februari y lo ta dedica na un hoben di ocho aña, Aljereau Tromp.

GLW Foundation ta e fundacion encarga cu organisacion di certamennan di beyesa Miss Teen Aruba Internacional y tambe Miss Turismo, pero e fundacion ta para pa hopi mas cu beyesa, “e ta para tambe pa aporta na cosnan positivo den comunidad,” Winterdaal a bisa.

Ariba dianan 13 y 14 di februari lo tin benta di cupcake. Pa e dianan aki ta bay tin un team cu lo deliver e cupcakenan.

Aljereau Tromp ta un mucha autista cu un nivel di autismo hopi halto, hopi severo cu ta haci cu e ta agredi su mes sin cu e por yuda. Esaki ta afecta no solamente Aljerou, pero tambe henter su famia.

Segun e mama di Aljereau, Joanna Croes ta splica, e condicion di autismo di Aljereau ta hopi severo y constantemente e ta purba evita cu Alejreau ta haci su mes, of su ruman, daño. Pa motibo di su condicion, Aljereau no ta papia mucho bon tampoco, solamente palabranan chikito.

“Berdad ta cu e convivencia cune ta birando dia pa dia mas dificil. Aljereau a cuminsa bira grandi, pisa, el a cuminsa bira mas agresivo,” Croes a indica.

El a menciona cu recientemente nan a bay pediatra y dokternan a diagnostica cu Aljereau tin un abnormalidad den un chromosoom. Segun Croes ta indica, no ta sigur ainda kico esey ta nifica pa locual ta e condicion medico, pero e ta sigur cu e ta nifica Aljereau lo tin mester di hopi mas test, tipo di testnan cu na Aruba no ta posibel pa haci.

Croes a remarca cu Aljereau por haya un miho cuido, educacion y tratamento na Hulanda, pero esaki ta rekeri hopi esfuerso pa por cubri e parti financiero. Pa e motibo aki GLW Foundation a organisa Cupcake di Speransa pa asina yuda Aljereau y su famia imigra pa Hulanda pa por brinda un miho calidad di bida na Aljereau.

Pa tur interesa den yuda cu Cupcake di Speransa pa Aljereau Tromp por tuma contacto cu George Winterdaal na 561-6151 pa bestel cupcake of pa haci donacion.