For di dialuna ultimo 11 di october, a keda conoci cu Organisacion Mundial di Salud (OMS) y su expertonan den vacuna a recomenda cu pashentnan determina den gruponan di risico por ricibi e di tres dosis adicional di e vacuna contra Covid-19.

Un estudio presenta pa Pfizer/BioNTech a conclui cu e nivel di anticuerpo lo multiplica cuatro biaha mas despues di e di tres dosis, compara cu e nivel existente di seis luna despues di ricibi e skema completo, loke ta reafirma tambe e proteccion contra e contagio di Covid-19 na un cifra di 95%.

Den mesun linea aki, de un comunicado di Departamento di Salud Publico di Aruba (DVG) a afirma cu despues cu nan a consulta cu entre otro RIVM di Hulanda y demas profesionalnan riba e materia a keda conoci cu proximamente un grupo selecta di comunidad di Aruba lo por cuminsa ricibi e di tres dosis di e vacuna aki, ta trata di personanan cu un sistema inmunologico comprometi of debil pa tuma un refuerso pa asina mantene nan anticuerpo presente.

Pa personanan cu no ta sufri di un malesa y cu ta sano esaki por nifica un vacuna di recordatorio pa cu e curpa lo bolbe subi e cantidad di anticuerpo den caso cu nan por a disminui, tambe ta importante pa trece dilanti cu aunke e persona por a wordo infecta cu Covid-19 esey no ta nifica cu no mag di vacuna, e nivel di proteccion ta hopi mayor ora ta anticuerpo ta wordo stimula cu e vacuna compara cu stimulacion di e infeccion.

Na e momento aki Departamento di Salud Publico hunto cu organisacion di dokternan di cas y tambe specialistanan ta reuniendo pa por yega na e grupo cu ta bin na remarke pa e di tres vacuna cu ta entre 1.000 cu 1.500 pashent.

E pashentnan cu ta bin na remarke manera ya a menciona ta personanan cu condicion di salud hopi fragil y mayoria ta bou tratamento di specialista of supervision di dokter di cas. A traves di dokter di cas of specialista e pashentnan aki lo ricibi un ‘verwijsbrief’ pa acudi na Departamento di Salud Publico (DVG) pa ricibi e di tres vacuna. Ta importante pa menciona cu sin ‘verwijsbrief’ ningun persona lo no por ricibi e di tres vacuna.

Pashentnan cu ta bin na remarke pa ricibi e di tres vacuna di Pfizer ta pashentnan cu tin un of mas di e condicionnan di salud aki bou menciona y alabes e pashent mester a ricibi su di dos vacuna di Pfizer mas cu 1 luna pasa. Esunnan cu ta bin na remarke ta:

  • Pashent cu menos di 2 aña pasa a ricibi un transplante di beenmerg of stamcel
  • Pashent cu a ricibi tratamento pa un malesa maligno hematologico e ultimo 2 añanan
  • Tur pashent cu tabata tin chemo na 2021
  • Cierto pashent cu  problema cu riñon cu tambe ta usa ‘biological’s. Nan ta bou tratamento di specialista
  • Pashent cu ta dialisa
  • Esunnan cu a ricibi un transplante di riñon
  • Pashent cu a wordo trata cu cierto remedi fuerte cu ta baha inmunidad, manera por ehempel Rituximab, Cyclofosfamide o CellCept.

Tambe nan a informa na Bon Dia Aruba cu e grupo aki ta esunnan cu te awor ta autorisa pa haya e di tres dosis, tocante e otro gruponan di comunidad nan a menciona cu te ainda no lo por haya esaki, si den proximo lunanan lo bin conseho pa vacuna e otro gruponan DVG lo informa na su momento.

Den e proximo 3 lunanan, ora un persona tin cita cu su specialista, e lo bay manda e persona na DVG pa busca e vacuna, si e persona no tin cita cu su dokter of specialista den e proximo 3 lunanan e ora ey por yama e oficina di specialista pa consulta si e persona ta cay bou di e grupo cu ta bin na remarke pa e di 3 vacuna y pa busca e ‘verwijsbrief’.

Ta hopi importante pa enfatisa cu sin ‘verwijsbrief’ di un specialista e personal di DVG no ta autorisa pa por duna ningun persona un di 3 vacuna y tambe pa ricibi e di tres vacuna e persona mester a ricibi su di dos vacuna di Pfizer mas cu un (1) luna pasa.

Di loke ta trata efectonan secundario, EMA a sigura cu “esey no ta conoci y nos ta controlando cu hopi cuidou”, entre esunnan mas conoci ta dolor den e brasa y por presenta kentura, tin evidencia cu na medida cu tempo ta pasa e anticuerponan ta disminui pero no di un manera significativo

Dia 17 di september ultimo, Merca a autorisa e di tres dosis di Pfizer y Moderna pa personanan mayor di 65 aña, cu tin condicionnan di salud existente y cu mayor riesgo, 4 di october ultimo Agencia Europeo di Medicamento (EMA) a autorisa esaki aki den personanan mayor 18 aña seis luna despues di e di dos dosis.

Organisacion Mundial di Salud a solicita pa e paisnan desaroya no aplica e di tres dosis pa di e forma aki e vacunanan lo wordo dirigi na e paisnan cu te ainda no a haya e vacunanan.

LEAVE A REPLY

Please enter your comment!
Please enter your name here